जनकपुरधाम । प्रदेश २ को नाम र राजधानी तोक्न दलहरूले पुरानै अडान यथावत राख्ने देखिएको छ । दलहरूले दर्ता गराएको प्रस्ताव र दर्ता गराउनको लागि गरिएको तयारीअनुसार पुरानै अवस्था दोहोरिने सम्भावना बढेको छ ।

प्रदेशसभा सचिवालयले वैशाख २ गते सुचना जारी गर्दै ९ गतेसम्म नामाकरण र स्थायी राजधानीको लागि प्रस्ताव दार्ता गराउन अह्वान गरेको थियो । तर, प्रस्ताव दार्ता गराउन बिहीबार अन्तिम दिन भएपनि दलहरू पुरानै अडानमा रहेको बुझिएको छ । 

तीन दलले पुरानै निर्णयअनुसार नै प्रस्ताव दर्ता गराएका छन् भने नेपाली कांग्रेसले पनि बिहीबार पुरानै प्रस्ताव दर्ता गराउने तयारी गरेको छ । प्रदेशसभाले यसयघि नमाकरण र राजधानी टुङगो लगाउन भोटिङ गराएपनि दलहरूको अडान र सांसदको क्रस भोटिङका कारण टुङ्गो लाग्न सकेको थिएन । 

एमाले पनि पुरानै अडानअनुसार अगाडि बढेको बुझिएको छ । बुधबार नेकपा एमाले माधव नेपाल पक्षका संसदीय दलका नेता सत्रुधन महतोले नामाकरणको लागि दुईओटा प्रस्ताव दर्ता गराएको जानकारी दिए । उनकाअनुसार नामाकरणको लागि जानकी र जनक नाम दर्ता गरिएको छ ।
राजधानी भने जनकपुरधाम राख्न प्रस्ताव दर्ता गरिएको छ । राजधानीको सीमाबारे जानकारी दिँदै नेता महतोले पुर्वमा कमला नदी, पश्चिममा मिथिला माध्यमिक परिक्रमा उत्तरमा ढलकेबर र दक्षिणमा भारतसम्म सीमा रहने बताए । 

कांग्रेस संसदीय दलका नेता रामसरोज यादवले मिथिला–भोजपुरा र राजधानी जनकपुरधाम प्रस्ताव दर्ता गराउने तयारी गरिएको बताए । सत्तारुढ दल जनता सामाजवादी पार्टी (जसपा) र नेकपा माओवादी केन्द्रले प्रदेशको नाम ‘मधेस प्रदेश’ दर्ता गराइसकेका छन् । वैशाख ५ गते प्रदेशको नाम र स्थायी राजधानीका लागि सत्तारुढ जसपा र माओवादी केन्द्रले प्रदेशको नाम मधेस प्रदेश र राजधानी जनकपुरधाम प्रस्ताव दर्ता गराएका थिए । 

प्रदेश २ को प्रदेशसभामा १०७ जना सांसद रहेकोमा चार जना कारबाहीमा परेका छन् । हाल सतारुढ दल जसपासँग ५६ जना प्रदेशसभा सदस्य छन् । त्यस्तै एमालेसँग २१, नेपाली कांग्रेससँग १९ र माओवादी केन्द्रसँग ७ जना प्रदेशसभा सदस्य रहेका छन् । 

यसअघि २०७६ चैत ४ गते प्रदेशको नाम र स्थायी राजधानीका लागि सचिवालयले गरेको प्रयास असफल भएको थियो । प्रदेशसभामा नामसम्बन्धी चारवटा प्रस्ताव र स्थायी राजधानीसम्बन्धी तीनवटा प्रस्तावमाथि प्रदेशसभामा मतदान भएको थियो । तर, नाम र राजधानीका लागि दर्ता गरिएका प्रस्तावहरूमध्ये कुनै पनि प्रस्तावको पक्षमा दुईतिहाइ मत आउन सकेन । 

यसअघिको नाम र राजधानीका लागि तत्कालीन समाजवादी पार्टी र राजपाले प्रदेशको नाम मधेस प्रस्ताव गरेका थिए । नेपाली कांग्रेसले मिथिला भोजपूरा प्रस्ताव दर्ता गराएको थियो भने कांग्रेसकै प्रदेशसभा सदस्य राजेश्वर साहले मध्यमधेस नाम प्रस्ताव दर्ता गराएका थिए । तत्कालीन नेकपाले जानकी नाम प्रस्ताव दर्ता गराएको थियो ।