आज (सोमवार) पनि कोभिड—१९ को संक्रमणका कारण एक घन्टामा एक जनाभन्दा बढीको मृत्यु भएको सरकारी तथ्यांक छ । सरकारी अभिलेखमा दर्ता नभएका अरू धेरैको संक्रमणका कारण ज्यान गएको हुनसक्ने अनुमान सहजै लगाउन सकिन्छ । यसको अर्थ हो नेपालमा कोभिड — १९ को संक्रमण रोकिएको छैन । युरोप र अमेरिकामा त कोभिड—१९ को संक्रमण नियन्त्रित नै भएन भने पनि हुन्छ । संक्रमण नियन्त्रण गर्न अपेक्षाकृत सफल मानिएका हङकङ, दक्षिण कोरिया र जापानमा समेत कोभिड—१९ को दोस्रो लहर सुरु भएको छ । फलस्वरूप, संक्रमण फैलन नदिन भौतिक दूरी कायम राख्नेलगायतका विधि र निषेधका उपायहरू फेरि अपनाउन थालिएको छ । नेपालमा भने विभिन्न राजनीतिक दल र शक्तिहरू महामारी फैलनसक्ने गतिविधि गर्न अग्रसर हुनपुगेका छन् ।   

राजनीतिक दल, व्यक्ति वा शक्ति कोही  पनि महामारी फैलन सक्ने काम गर्न अगाडि सर्दैनन् । तर, केही दिन यता नेपालका विभिन्न सहरहरूमा राजाका पक्षमा नारा लगाउनेहरूले उनीहरूको जुलुसले महामारी फैलनसक्ने जोखिमलाई बेवास्ता गरेको देखिएको छ । त्यसो त अरू राजनीतिक दलका नेताहरूले पनि पार्टी र गुटका भेला गरिरहेका छन् । आफ्नो सानो असावधानीले पनि समुदायमा कोभिड—१८ को संक्रमण हुनसक्ने जोखिमलाई बेवास्ता गरेर तिनले पनि राजाका पक्षमा नारा लगाउनेहरूले जस्तै गैरजिम्मेवार प्रवृत्ति देखाएका थिए । भौतिक दूरी र सुरक्षा सवधानीको बेवास्ता गर्दा कतिपय दलका नेताहरू स्वयं त्यस्ता कार्यक्रममा भाग लिएर फर्केपछि संक्रमित भएको समाचार सार्वजनिक पनि भएको छ । यसैले कोभिड—१९ को संक्रमण फैलन सक्ने कुनै पनि क्रियाकलापलाई अहिले समाजविरोधी कार्र्य भन्नुपर्ने देखिन्छ । 

नेपालको संविधानले कुनै व्यक्ति वा शक्तिलाई शान्तिपूर्वक आफ्नो विचार अभिव्यक्त गर्ने अधिकार दिएको छ । सरकारले नागरिकको त्यस्तो अधिकार र स्वतन्त्रतामा हस्तक्षेप गर्नु हुँदैन । यसैले राजाका पक्षमा नारा लगाउँदैमा निषेध गर्नु वा प्रतिबन्ध लगाउनु असंवैधानिक हुन्छ । तर, कसैका पक्षमा पनि जुलुस निकाल्ने वा नारावाजी गर्नेले आफू र अरूलाई पनि जोखिममा पार्न लागेमा भने सरकारले तमासा हेरेर बस्न मिल्दैन । नेपाल सरकारका कर्मचारीमा भने कि अनावश्यक बल प्रयोग गरेर दमन गर्ने नभए टुलुटुलु हेरेर बस्ने प्रवृत्ति निकै बलियो छ । जाडो याममा कोभिड—१९ संक्रमण फैलने जोखिम बढी हुने मानिन्छ । संक्रमण फैलने वा फैलाउने क्रियाकलाप हुन नदिने दायित्व मूलतः सरकारकै हो । यसैले राजाका पक्षमा जुलुस निकाल्नेहरूलगायत कसैले पनि महामारी फैलने जोखिम बढाउन खोजे सरकारले नियन्त्रण गर्नुपर्छ । जुलुसमा जानेहरूलाई समेत संक्रमित हुनबाट रोक्ने सरकारको कर्तव्य हो भने तिनको परिवार र समुदायलाई संक्रमणबाट जोगाउन सरकारले कानुनबमोजिम निषेध र नियन्त्रणका उपाय अपनाउनुपर्छ । महामारीको जोखिम बढ्न नदिन सरकार र नागरिकहरूसमेत सजग हुनु जरुरी छ । नेपाली जनताको स्वास्थ्य रक्षा गर्ने दायित्वबाट सरकार विमुख नहोओस् ।