दाङ । बालुवा वासिङ उद्योगको अनुमति लिएर क्रसिङको काम गर्ने १० वटा उद्योगलाई बन्द गर्न निर्देशन दिइएको छ । प्रमुख जिल्ला अधिकारीको नेतृत्वमा रहेको अनुमगन समितिले यस्तो निर्देशन दिएको प्रमुख जिल्ला अधिकारी जयनारायण आचार्यले बताए ।

प्रजिअ आचार्यका अनुसार जिल्लामा ३२ वटाले बालुवा वासिङको अनुमति लिए पनि ७ वटा सञ्चालनमा नरहेको बताए । हाल जिल्लामा २७ वटा बालुवा वासिङ उद्योगहरू सञ्चालनमा छन् । २७ वटा वासिङ उद्योगमध्ये १० वटाले एउटाको अनुमति लिएर अर्को कारोबार गरिरहेको पाइएको उनको भनाइ छ । ‘‘एकको अनुमति लिएर अरु काम गरिरहेका उद्योगहरूलाई बन्द गर्न निर्देशन दिएका छौँ,’’ प्रमुख जिल्ला अधिकारी आचार्यले भने ।

उद्योगमा रहेका सामग्री व्यवस्थापनका लागि अनुगमन समितिले १५ दिनको म्यादसमेत दिएको छ । दिएको निर्देशन पालना भए/नभएको बारे पुनः अनुगमन गरिने आचार्यले बताए । निर्देशनअनुसार क्रसिङको काम बन्द नगरिए सेवा-सुविधा कटौती गरिने पनि उनले बताए । गृह मन्त्रालयले जिल्लामा रहेका क्रसर तथा बालुवा प्रशोधन उद्योगहरू अनुमनका लागि पत्राचार गरेपछि अनुगमन गरिएको हो । जिल्लामा रहेका सबै उद्योगको एकैपटक अनुगमन गरिएको सम्भवतः पहिलोपटक हो ।

प्रजिअलगायत विभिन्न कार्यालयका प्रमुख तथा प्रतिनिधिहरूले चार दिन लगाएर सबै उद्योगको अनुगमन गरेको आचार्यले बताए । अनुगमनपछि अनुगमनबाट प्राप्त जानकारीको अवस्थाको विश्लेषण गर्दै प्रतिवेदन तयार पारेर गृह मन्त्रालयमा पठाइएको पनि उनले बताए । अनुगमन समितिले सुझावसहित प्रतिवेदन पठाएको आचार्यले बताए । उनकाअनुसार मापदण्ड एकरुपता बनाउनुपर्ने, समयसापेक्ष मापदण्ड परिवर्तन गरिनुपर्नेलगायत सुझाव दिएर पठाइएको छ ।

अनुगमनका क्रममा जिल्ला प्रशासन कार्यालयका दाङका प्रमुख जिल्ला अधिकारी, समन्वय अधिकारी र विभिन्न कार्यालयका प्रतिनिधिहरूको टोली करिब ४० बढी उद्योगको अनुगमनमा पुगेको थियो । जिल्लामा रहेका क्रसर तथा बालुवा वासिङ उद्योगहरू दर्ता भएर सञ्चालनमा आएको प्रमुख आचार्यले बताए । ‘‘सबै उद्योगहरू दर्ता भएर नै सञ्चालनमा आएको पाइएको छ तर कागजी रुपमा उद्योगहरूले सबै प्रक्रिया पूरा भए पनि फिल्डमा हेर्दा त्यसअनुसार छैन,’’ प्रजिअ आचार्यले भने ।

पहिलेको आधारमा कागजात हेर्दा मापदण्डअनुसारै भएको पाइए पनि अहिले भनेविपरीत देखिएको अनुगमन समितिले जनाएको छ । गृह मन्त्रालयले देशभरका ७७ वटै जिल्लामा पत्राचार गर्दै मापदण्डविपरीत क्रसर उद्योग सञ्चालन भए/नभएको बारेमा अनुगमन गरी एक साताभित्र पेस गर्न निर्देशन दिएको थियो । जिल्लामा रहेका क्रसर तथा बालुवा वासिङ उद्योगहरूमा एक हजारजनाले प्रत्यक्ष तथा अप्रत्यक्ष रोजगारी प्राप्त गरेका छन् । राज्यले वार्षिक ५० करोड राजस्व प्राप्त गरेको छ । त्यसैगरी वार्षिक एक अर्बको आन्तरिक कारोबार गर्ने गरेको आचार्यको भनाइ छ ।