जनकपुर । नेपालमा हिन्दु समुदायले मनाउने चाडपर्वमा प्रमुख दुई धार्मिक उत्सव आउँछ, दसैँ र तिहार । अन्य बेला नियमित तलब सुविधा नपाउने कर्मचारीले पनि यी पर्वका बेला समयमै बोनससहित रकम पाउँछन् । जनकपुरस्थित जानकी मेडिकल कलेजमा काम गर्ने चिकित्सक तथा कर्मचारीका लागि न दसैँ आयो न तिहार ।

आठ महिनादेखि बाँकी रहेको तलब माग गर्दै संघर्षमै दसैँ बिताएका त्यहाँका कर्मचारी आमरण अनशनमा बसेर तिहार छल्दै छन् । धनुषाको रमदैया भवाडीमा रहेको जानकी मेडिकल कलेज शिक्षण अस्पतालका कर्मचारीद्वय जानकीशरण यादव र कुल्दीप साह आमरण अनशनमा बसेको आइतबार १५ दिन पुगिसक्यो ।

अनशन बसेको ११औं दिन गत बुधबार उनीहरुलाई रमदैयास्थित शिक्षण अस्पतालबाट प्रहरीले जबरजस्ती उठाएर प्रादेशिक अस्पतालमा पुर्‍याइदियो । गाउँ, समुदायमा तिहारको रमझम चलिरहँदा मेडिकल कलेजका कर्मचारीहरु अस्पतालको शय्यामा पल्टिरहेका छन् । परिवारका सदस्यहरु कुरुवा बस्‍न बाध्य छन् ।  

किन बस्‍नुपर्‍यो अनशन ?
आठ महिनादेखि बक्यौता रहेको तलब र ६ वर्षदेखि रोकेको सञ्चयकोषमा पठाउनुपर्ने रकम तत्काल पठाउनुपर्नेलगायत मागसहित विगतको सम्झौता कार्यान्वयन गर्न कर्मचारीहरुले गत भदौ १२ गते कलेज प्रशासनलाई ज्ञापनपत्र बुझाए ।

कलेजको सञ्चालक पक्षले कुनै सुनुवाइ नगरेपछि भदौ २६ गतेदेखि कर्मचारीले प्रशासन शाखामा तालाबन्दी गरे । त्यसको पाँचौं दिनमा जिल्ला प्रहरी कार्यालयका डीएसपी मकेन्द्र मिश्रको रोहबरमा कलेजको सञ्चालक पक्ष र कर्मचारीबीच तीनबुँदे सम्झौता भयो ।

उक्त सम्झौताअनुरुप तत्कालै कर्मचारीले प्रशासन शाखामा लगाएको ताला खोलिदियो । कलेजको हिसाब-किताब दुवै पक्ष (कर्मचारी र कलेज) को लेखापालको उपस्थितिमा सार्वजनिक गर्ने र असोज ३० गतेसम्म कलेज सञ्चालक पक्षले कर्मचारीको सबै समस्या सम्बोधन गरिसक्ने कुरा पनि सम्झौतापत्रमा उल्लेख छ । तर, सञ्चालकले कर्मचारीको समस्या सम्बोधन गर्नुको साटो आन्दोलनको नेतृत्व गर्ने कर्मचारीहरुलाई बर्खास्त गर्न थाल्यो ।

सम्झौताअनुरुप असोज ११ गते हिसाबकिताब गर्न दुवै पक्षको लेखापालले काम थाल्नुपर्नेमा कलेज सञ्चालक पक्षपछि हट्यो । १२ गते कर्मचारीहरु धर्नामा बसेपछि आन्दोलनको अगुवाइ गर्ने कर्मचारीहरुलाई एकपछि अर्को स्पष्टीकरण माग्दै पत्र थमाउन थालियो । असोज २६ गते पाँचजना कर्मचारीलाई बर्खास्त गरियो ।

कर्मचारीलाई काम गरेको तलब नदिने, मागेपछि जालझेल गरी जागिरबाट निकाल्ने कलेज सञ्चालकको रवैयाविरुद्ध दुई कर्मचारी कात्तिक १६ गतेदेखि आमरण अनशनमा बसेका हुन् । उनीहरुको पीडालाई ध्यानमा राखेर कलेजमा कार्यरत कुनै कर्मचारीले तिहार नमनाएको कर्मचारी हकहित संघर्ष समिति संयोजक उमेश यादवले बाह्रखरीलाई बताए ।