दाङ । नेपालीहरुको महान चाड वडादसैं नजिकिँदै छ । दसैं नजिकिँदै गर्दा दाङका किसानलाई भने खेतमा पाकेको धान भित्र्याउने चटारो परेको छ । 

किसानहरु यतिबेला खेतमा पाकेको धान काट्ने, सुकाउने, दाउने र भित्र्याउने काममा व्यस्त छन् । जताततै धान पाकेर पहेँलपुर भएको छ । किसानहरु खेती स्याहार्नका लागि बिहानदेखि बेलुकीसम्म खेतबारीमै देखिन्छन् ।

गत वर्षहरुमा दसैंपछि मात्र धान काट्न सुरु हुन्थ्यो तर यो वर्ष जेठ महिनामै रोपाईं सुरु भएका कारणले पनि समय अगाडि नै धान काट्न चटारो परेको किसानहरु बताउँछन् । जिल्लाका किसानले असोज पहिलो सातादेखि नै धानवाली भित्र्याउन सुरु गरेका हुन् ।

यस वर्ष समयमै वर्षा भएकाले समयमै धान भित्र्याउने चटारो परेको तुलसीपुर ७ का एक किसान झुपलाल खनालले बताए । "गत वर्षहरुभन्दा यो वर्ष धान राम्रो फलेको छ," उनले भने, "अहिले धान उत्पादनमा वृद्धि हुने देखिन्छ । राज्यले समयमै मल उपलब्ध गराउन सकेमा धान उत्पादनमा बृद्धि हुने सोही ठाँउका अर्का किसान सन्तोष सुनारले बताए । 

उनले भने, "कोभिड-१९ ले गर्दा यो वर्ष रोजगारीका लागी बाहिर गएका धेरै युवाहरु स्वदेश फर्किए । समयमै पानी पनि पर्‍यो । त्यसपछि समय-समयमा मल राखे । अहिले धान राम्रो फलेको छ ।"

वर्ष दिनभरी खाने खेती धान पाकिसकेकाले घर लिपपोत गर्नसम्म नभ्याएको सोही ठाउँकी किसान रमा धितालले बताइन् । उनले कोरोना महामारीबीचमा आफूले सावधानी अपनाउँदै धान भित्र्याउनमा लागेको बताइन् । 

वर्षेनि असोज महिनाको अन्तिम सातादेखि मंसिर अन्तिमसम्म जिल्लाका किसानहरु धानबाली भित्र्याउनमै व्यस्त हुने गर्दछन् । यसैबीच कृषि ज्ञान केन्द्र दाङका अनुसार दाङमा यो वर्ष कोभिड-१९ का कारण धान खेती हुने क्षेत्र बढेको छ ।

खेती हुने क्षेत्र बढेकाले उत्पादन पनि बढ्ने अनुमान गरिएको छ । कृषि ज्ञान केन्द्र दाङका सूचना अधिकारी उमेश श्रेष्ठले यस वर्ष ३८ हजार ४९७ हेक्टर जग्गामा धान खेती भएको जानकारी दिए । 

उनका अनुसार उक्त जग्गामा यस वर्ष झण्डै एक लाख ७९ हजार मेट्रिक टन धान उत्पादन हुने अनुमान गरिएको छ । साथै केन्द्रको तथ्यांक हेर्दा गत बर्ष ३७ हजार ७१० हेक्टर क्षेत्रफलमा धान खेती भएको थियो भने एक लाख ६९ हजार ६९५ मेट्रिक टन धान उत्पादन भएको थियो ।