काठमाडौं । राष्ट्रिय व्यवसायिक पहल (एनबीआई) ले मानव जीवन र स्वास्थ्यसँग प्रत्यक्ष सरोकार राख्‍ने वस्तुहरुको बिक्री वितरणमा भएको गैर-कानुनी क्रियाकलापप्रति गम्भीर ध्यानाकर्षण भएको जनाएको छ । एनबीआईले आम जनमानसमा गम्भीर असर पार्ने गलत क्रियाकलापको विरोध गर्दै आवश्यक कानुनी कारवाही अगाडि बढाउन सरकारसँग अनुरोध गरेको छ । 

हालको यस विषम परिस्थितिमा समाज र मुलुकप्रति जिम्मेवार भइ न्युनतम व्यवसायिक आचारसंहिता भित्र रही आफ्नो व्यवसायिक जिम्मेवारीलाई इमान्दारिताका साथ निर्वाह गर्न गराउन सम्पूर्ण उद्यम व्यवसाय क्षेत्रलाई एनबीआईले आग्रह गरेको छ ।

मुलुक विश्वव्यापी महामारीको रुपमा देखापरेको कोभिड-१९ बाट आक्रान्त छ । कोरोना महामारी नियन्त्रणको लागि सरकारले गरेको ६ महिनाभन्दा लामो लकडाउन तथा निषेधाज्ञाका कारण धराशायी भएको सम्पूर्ण आर्थिक तथा व्यवसायीक क्षेत्रले सरकारले लकडाउन खुकुलो पारेसँगै विस्तारै गति लिन सुरु गरेको छ । 

“मानव सभ्यताकै साझा शत्रुको रुपमा स्थापित हुदै गरेको यस महामारीलाई परास्त गर्न समाजको सवै पक्षको उत्तिकै जिम्मेवारी र दायित्व छ । आम उपभोक्तासंग जोडिने व्यवसायिक क्षेत्र अझ बढी संवेदनशी हुन जरुरी छ,” जारी विज्ञप्तीमा भनिएको छ ।

जोखिम न्युनीकरणका निम्ति सरकारले अवलम्वन गरेका विविध उपायहरुको बाबजुद संक्रमणको दर तीव्र गतिमा बढ्दै जाँदा थप सन्त्रास र अन्यौलता सिर्जना हुदै गइरहेको आएबीआईले जनाएको छ । 

“अतः सम्पूर्ण उद्यमी व्यवसायी, आम उपभोक्ता सवैले स्वास्थ्य सुरक्षा सम्वन्धी निर्धारित मापदण्डको पुर्ण पालना गरी सुरक्षित समाज निर्माणका लागि आ-आफनो जिम्मेवारीलाई अगाडि बढाउन राष्ट्रिय व्यवसायिक पहल सरोकारवाला सबैसँग हार्दिक आग्रह गर्दछ ।”

स्वच्छ समाज र समृद्ध मुलुक निर्माणको लागि असल व्यवसायिक अभ्यासको प्रवद्र्धन एवं कार्यान्वयनमा सम्वन्धित सवै पक्षको सहयोग एवं सकारात्मक योगदान रहने विश्वास गरेको पहलले जनाएको छ ।