दाङ । खाद्य व्यवस्था तथा व्यापार कम्पनी लिमिटेड तुलसीपुर शाखाले यस वर्ष धान र चिनी खरिद गर्ने जनाएको छ ।

कम्पनीले स्थानीयस्तरबाट १० हजार क्‍विन्टल धान खरिद गरेर चामल बनाएर बिक्री गर्ने कार्यालय प्रमुख माधव मिश्रले जानकारी दिए । उनका अनुसार सरकारले तोकेको मूल्यमा धान खरिद गरिनेछ । हाल कारागारहरु, रुकुम पूर्व, पश्चिम र डोल्पामा स्थलमार्गबाट चामल पुर्‍याउँदै आएको कम्पनीले यस वर्ष धान पनि खरिद गर्ने उनले बताए ।

त्यस्तै हाल विभिन्‍न प्रकारका चामल उपलब्ध गराउँदै आएको कार्यालयमा अझै पनि ११ सय ९५ क्‍विन्टल चामल मौज्दात छ । अहिले कारागारलाई चामल उपलब्ध गराउँदै आएको कार्यालयले ढुवानीका लागि टेन्डर नभएका कारण अन्य क्षेत्रमा भने चामल पुर्‍याउन सकेको छैन । त्यसैले उक्त चामल गोदाममै थन्किएको हो । 

लकडाउनको समयमा केही चामल बिक्री भए पनि अहिले बिक्री ठप्प छ । कार्यालयले लकडाउन अवधिमा कारागारलाई चार हजार क्‍विन्टल चामल उपलब्ध गराए पनि अन्य व्यक्ति र संस्थाले भने किनेका छैनन् । ‘‘हामीहरुसँग चामल पर्याप्त छ, ढुवानी टेन्डर नभएकाले अन्यत्र पठाएका छैनौं, आवश्यक परे हामीहरुले उपलव्ध गराउने छौ,’’ प्रमुख मिश्रले भने ।

कम्पनीमा माटो चामल, मध्यम, स्ट्रिम सोना, सोना स्ट्रिम, जापानी चामल मौज्दात छन् । 

दुई सय टन चिनी किनिँदै
त्यसैगरी कार्यालयले यस वर्ष उपभोक्ताको सहजताका लागि दुई सय टन चिनी पनि खरिद गर्ने जनाएको छ । खाद्य व्यवस्था तथा व्यापार कम्पनी लिमिटेडले हजार टन चिनी खरिद गर्न लागेको र त्यसमध्ये दुई सय टन चिनी दाङमा ल्याउन लागेको जनाएको छ । अब केही समयमै सो चिनी ल्याउने कार्यालयले जनाएको छ ।

दसैं-तिहारलाई मध्यनजर गरी चिनी खरिद गर्न लागेको र सो चिनी सहकारी व्यापारीहरुलाई सुलभ मूल्यमा उपलब्ध गराउने बताएको छ । बजार भाउभन्दा केही सस्तोमा बिक्री गर्ने कार्यालय प्रमुख मिश्रले जानकारी दिएका छन् । ‘‘हामीहरुले बिक्री गर्ने चिनी बजार भाउभन्दा केही सस्तो हुनेछ,’’ मिश्रले भने ।

के छ खसी-बोका किन्‍ने तयारी ?
यसैबीच दसैं-तिहारका लागि खसी-बोका खरिद गर्दै आएको शाखा कार्यालयले यस वर्ष खसी बोका खरिदका लागि कुनै जानकारी नआएको जनाएको छ । 

दसैंका लागि काठमाडौं उपत्यकामा बिक्री गर्न सरकारी स्वामित्वको खाद्य व्यवस्था तथा व्यापार कम्पनीले च्याङ्ग्रा र खसी-बोका खरिद गर्न तयारी थालेको छ । घटस्थापनासम्म काठमाडौं ल्याई पुर्‍याउने गरी १४ सय च्याङ्ग्रा र १६ सयवटा खसी-बोका खरिद गर्ने गरी तयारी गरिएको कम्पनीकी सूचना अधिकारी शर्मिला न्यौपाने सुवेदीले जानकारी दिइन् । 

यसपालि दसैंमा खसीबोकाको मूल्य नबढ्ने

कम्पनीको वार्षिक कार्यक्रममा उक्त परिमाणको च्यांग्रा र खसी-बोका आयात गर्न ५ करोड ९९ लाख ८६ हजार रुपैयाँ बजेट छुट्याइएको उनको भनाइ छ । यस वर्ष मुस्ताङबाट १४ सय च्यांग्रा तथा दाङको तुलसीपुर र मकवानपुरको हेटौंडाबाट १६ सय वटा खसी किन्‍ने योजना कम्पनीको छ ।

कम्पनीले खरिद गर्ने च्यांग्रा तथा खसी बोकाको भाउ सम्बन्धित जिल्लाका प्रमुख जिल्ला अधिकारीको संयोजकत्वमा रहने मूल्य निर्धारण समितिको सिफारिसअनुसार हुनेछ । गत वर्ष दसैंमा संस्थानले पाँच सय खसी बोका तथा च्यांग्रा खरिद गरेर सहुलियत मूल्यमा बिक्री गरेको थियो ।