काठमाडौं । सरकारले यो वर्षको दसैंमा तीन हजार खसी च्यांग्रा बेच्‍ने भएको छ । खाद्य आपूर्ति व्यवस्था गर्न सरकारले स्थापना गरको खाद्य व्यवस्था तथा आपूर्ति कम्पनीले मोफसलबाट १४ सय च्यांग्रा तथा १६ सय खसीबोका किनेर सर्वसाधारणलाई बेच्‍ने भएको हो ।

कम्पनीकी प्रवक्ता शर्मिला न्यौपाने सुवेदीले तीन हजारको हाराहारीमा ’लाइभस्टक’ ल्याएर बेच्‍न लागिएको बाह्रखरीलाई जानकारी दिइन् । यो संख्या अघिल्लो वर्षकै बराबर हो । गत वर्ष कम्पनीले तीन हजार २० खसी बोका तथा च्यांग्रा ल्याएको थियो ।

खसीबोका च्यांग्राका लागि कम्पनीले पाँच करोड ९९ लाख ८६ हजार रुपैयाँ छुट्याएको छ । अर्थात् कम्पनीले प्रतिखसी-च्यांग्रा २० हजार रुपैयाँ खर्च गर्ने योजना बनाएको छ । गत वर्ष ५ करोड ९८ लाख रुपैयाँ खर्च भएको थियो ।

यो वर्ष पनि जिउँदो खसीबोका वा च्यांग्राको मूल्य गत वर्षकै बराबर हुने अनुमान छ । यद्यपि खसीबोका खरिद लागत, ढुवानी तथा प्रशासनिक खर्चका आधारमा मूल्य तय हुने सुवेदीले बताइन् । उनले भनिन्, “विनियोजित बजेट र खरिद संख्या गत वर्षकै बराबर हो । जिउँदोको मूल्य अझै तय गरिसकेका छैनौं ।”

कम्पनीले गत वर्ष हेटौंडा र तुल्सीपुरबाट खसीबोका तथा च्यांग्रा ल्याएकामा यो वर्ष अन्य ठाउँबाट पनि ल्याउने तयारी गरिरहेको छ । च्यांग्रा भने मुस्ताङबाटै आउनेछन् ।