दाङ । दाङको घोराहीबाट प्रहरीले दुई जना ‘नक्कली प्रहरी’लाई समातेको छ । दुवै जनालाई शनिबार घोराहीबाट पक्राउ गरिएको जिल्ला प्रहरी कार्यालय दाङले जनाएको छ । 

प्रहरीको नक्कली परिचय पत्र देखाएर होटेलहरुमा निःशुल्क खाना खाने, होटेल सञ्चालकहरूसँग पैसा माग्‍ने तथा धम्क्याउने गरेको आरोपमा घोराही उपमहानगरपालिका ९ दक्षिण कर्मटुवा निवासी ३० बर्षीय सरोज नेपाली र सल्यान जिल्लाको दार्मा गाउँपालिका ४ भलचौर निवासी ३० वर्षीय गोपाल मल्ल पक्राउ परेका हुन । 

जिल्ला प्रहरी कार्यालय दाङका प्रवक्ता डीएसपी सुमित खड्काका अनुसार नेपालीले आफुलाई जिल्ला प्रहरी कार्यालय घोराही दाङमा कार्यरत सई योगेन्द्र हमाल भएको भन्दै नक्कली परिचय पत्र देखाएर होटेलहरुमा निशुल्क खाने र पैसा मागेर थर्काउनेजस्ता कार्य गर्दै आएका थिए । 

नेपालीले घोराही १५ ट्राफिक चोकस्थित लुम्बिनी होटेल र मालिका भ्याली भ्यू होटेलमा गई होटेल सञ्चालकलाई अभद्र व्यवहार गरेको तथा ‘मासिक रुपमा रकम दिनुपर्छ’ भनेर धम्क्याउने गरेको उजुरीका आधारमा पक्राउ गरिएको डीएसपी खड्काले जानकारी दिएका छन् ।

त्यस्तै हमालले आफू असई भएको भन्दै घोराही १५ ट्राफिक चोकको पाहुना गेष्ट हाउनमा पैंसा नदिएरै फ्रिमा खाना खाने गरेको तथा होटेल सञ्चालकलाई धम्क्याउने समेत गरेका थिए ।