काठमाडौं । अन्तर्राष्ट्रिय जलरंग समाज (आईडब्लूएस) नेपालको चौथो वार्षिकोत्सवका अवसरमा १४ देशका कलाकारको अनलाइन कला प्रदर्शनीको सोमबार प्रिमियर भएको छ ।
‘स्पल्यासेस’ शीर्षकमा आयोजना भएको कला प्रदर्शनीमा नेपाललगायत १४ देशका ६५ कलाकारका एक–एकवटा कला प्रदर्शनीमा राखिएका छन् । प्रदर्शनीको सु्रुआत आईडब्लूएस ग्लोबका अध्यक्ष अतानुर डोगनको छोटो स्वागत मन्तव्यबाट भएको हो ।
प्रदर्शनीमा चित्रकार अतानुर डोगन सहित २८ जना विदेशी र आइडब्लूएस नेपालका अध्यक्ष सहित जम्मा ३७ जना नेपाली चित्रकारहरुको कला सजिएका छन् ।
प्रदर्शनीबारे जलरंग समाजका अध्यक्ष एनबी गुरुङ भन्छन्, “हामीले हरेक वर्ष गर्दै आएका छौं । तर यो वर्ष प्रत्यक्ष गर्न नसक्ने भएकाले अनलाइनमार्फत विभिन्न देशका कलाकारले लकडाउनमा गरेका सिर्जना सबैलाई देखाउन पाओस् र सम्बन्ध पनि विस्तार गर्ने हेतुले यो प्रदर्शनीको आयोजना गरेका हौं ।”
उनका अनुसार प्रदर्शनीको उद्देश्य कला बिक्री गर्नेभन्दा पनि कलाकारको सिर्जनालाई प्रदर्शन गर्ने मौका दिएर देश–विदेशका कलाप्रेमीसम्म कला पुर्याउने रहेको छ । अहिले नै बिक्री नभए पनि ग्राहकले पछि कलाकारलाई सम्पर्क गरी कला किन्न सकिने उनले विश्वास लिएका छन् ।
करिब १३ मिनेट लामो अनलाइन प्रदर्शनीमा जलरंगको प्रयोगगरि कोरिएका प्रकृतिका सुन्दर दुश्यदेखि मानव विचको सम्बन्ध, चराचुरुङ्गी, रहनसहन, संस्कृति र भगवानका अनेक रुप, भावनालाई उतारिएका चित्रकलाहरु देख्न सकिन्छ । अन्तराष्ट्रिय जलरंग समाज १०० भन्दा बढी देशहरुमा फैलिएका छन् ।
आइडब्लूएसको आधिकारीक युट्युब च्यानल र फेसबुकमार्फत आज साँझ ६ बजे लाइभ प्रिमियर सुरु भएको हो ।
प्रदर्शनीमा नेपाल, अमेरिका, भारत, बंगलादेश, चीन,साउथ अप्रिका, फिलिपिन्स, इन्डोनेसिया, हङकङ, इरानलगायत मुलुकका कलाकारको प्रतिनिधित्व रहेको छ । अनलाइन कला प्रदर्शनी अवलोकनको लागि यो लिंकमा जान सकिन्छ ।
