काठमाडौं । १४ देशका कलाकारको कला एकैथलोमा प्रदर्शन हुने भएको छ । आज (सोमबार) अन्तर्राष्ट्रिय जलरंग समाज (आईडब्लूएस) को चौथो वार्षिकोत्सवका उपलक्ष्यमा १४ देशका कलाकारको कला अनलाइनमार्फत एकै थलोमा प्रदर्शन हुन लागेको हो ।
‘स्प्रल्यास’ शीर्षकमा हुने प्रदर्शनीमा नेपाललगायत १४ देशका ६५ कलाकारका एक–एकवटा कला प्रदर्शनीमा राखिनेछन् ।
प्रदर्शनीबारे जलरंग समाजका अध्यक्ष एनबी गुरुङ भन्छन्, “हामीले हरेक वर्ष गर्दै आएका छौं । तर यो वर्ष प्रत्यक्ष गर्न नसक्ने भएकाले अनलाइनमार्फत विभिन्न देशका कलाकारले लकडाउनमा गरेका सिर्जना सबैलाई देखाउन पाओस् र सम्बन्ध पनि विस्तार गर्ने हेतुले यो प्रदर्शनीको आयोजना गरेका हौं ।”
उनका अनुसार प्रदर्शनीको उद्देश्य कला बिक्री गर्नेभन्दा पनि कलाकारको सिर्जनालाई प्रदर्शन गर्ने मौका दिएर देश–विदेशका कलाप्रेमीसम्म कला पुर्याउने रहेको छ । अहिले नै बिक्री नभए पनि ग्राहकले पछि कलाकारलाई सम्पर्क गरी कला किन्न सकिने उनले विश्वास लिएका छन् ।
आइडब्लूएसको आधिकारीक युट्युब च्यानल र फेसबुकमार्फत आज साँझ ६ बजे लाइभ प्रिमियर हुनेछ । प्रदर्शनीमा नेपाल, अमेरिका, भारत, बंगलादेश, चीन, फिलिपिन्स, इन्डोनेसिया, इरानलगायत मुलुकका कलाकारको प्रतिनिधित्व रहनेछ ।