काठमाडौं । सत्तारूढ नेपाल कम्युनिस्ट पार्टी (नेकपा)ले असार १० गतेदेखि जारी स्थायी कमिटी बैठक टुङ्ग्याएर केन्द्रीय कमिटी बैठक बोलाउने तयारी गरेको छ ।

बिहीबार मध्याह्न बालुवाटारमा प्रधानमन्त्री केपी शर्मा ओली, पार्टी अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपालबीच द्विपक्षीय छलफल भएको थियो ।

दुवै पक्ष आ–आफ्नै अडानमा रहेका कारण बैठक निष्कर्षविहीन बन्न पुगेको थियो । प्रचण्ड–नेपालले राजीनामा दिन दबाब दिए पनि ओलीले अडानमा टसको मस भएका थिएनन् । उनले कुनै पनि हालतमा दुवै पद नत्याग्ने बताएपछि बैठक निष्कर्षविहीन बनेको थियो ।

ओली सहमतिमा नआएपछि प्रचण्ड, वरिष्ठ नेता झलनाथ खनाल, माधवकुमार नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठ, गृहमन्त्री रामबहादुर थापा बादलसहितका नेता खुमलटार भेला भएका थिए । खुमलटार भेलालले एक महिनाभित्र केन्द्रीय कमिटीको बैठक बोलाउने निचोड निकालेको वरिष्ठ नेता झलनाथ खनालले जानकारी दिए ।

खुमलटारको भेलामा रघुजी पन्तलगायत ७ जना स्थायी कमिटी सदस्य पनि उपस्थित थिए ।

“एकमहिनाभित्र केन्द्रीय कमिटी बोलाउनेबारेमा छलफल भयो । भोलि केन्द्रीय कमिटी बैठकको मिति तोकेर स्थायी कमिटी टुङ्याउनेमा अनौपचारिक छलफल भएको छ,” उनले बाह्रखरीसँग भने ।

स्थायी कमिटी बैठक टुङ्ग्याउनेबारे ओलीनिकट नेताहरूले पनि सङ्केत दिएका थिए ।

प्रचण्ड–नेपालसँगको बैठकपछि ओलीले आफूनिकट केही नेता, ईश्वर पोखरेल, महासचिव विष्णु पौडेल, संसदीय दलका उपनेता सुवास नेम्वाङलाई बालुवाटार बोलाएर परामर्श गरेका थिए ।

बालुवाटारको छलफलमा गएकामध्ये एक नेताले स्थायी कमिटी बैठक शुक्रबार अन्त्य हुने तर कसरी र कुन निष्कर्षका साथ अन्त्य हुने भन्नेचाहिँ टुङ्गो लागि नसकेको बताएका थिए ।

खुमलटार भेलालले केन्द्रीय कमिटी बैठक बोलाउने निष्कर्षका साथ स्थायी कमिटी बैठक अन्त्यको प्रस्ताव गर्न लागेको खनालले बताएका छन् ।

नेकपाको स्थायी कमिटी बैठक असार १० गतेदेखि सुरु भए पनि एजेन्डामाथि छलफल नै हुन सकेको छैन । ६ दिन सीमा समस्यामा केन्द्रित रहेर छलफल भएको थियो ।

असार १४ गते प्रधानमन्त्रीले पार्टीका नेताहरूलाई समेत साथ लिएर भारतले सरकार ढाल्न लागेको बताएपछि बैठक तरङ्गित हुन पुगेको थियो ।

पार्टी अध्यक्ष प्रचण्ड, वरिष्ठ नेताद्वय खनाल र नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठसहित ११ जना स्थायी कमिटी सदस्यले बैठकमै राजीनामाको माग गरेपछि असार १८ गतेदेखि बैठक अवरुद्ध हुँदै आएको छ ।

पछिल्लोपटक असार २६ गतेलाई तय भएको थियो । तर, बाढी, पहिरोलाई कारणदेखाएर एकहप्ता धकेलिएको थियो । भोलि पनि एजेन्डामाथि घनिभूत छलफल नगरी केन्द्रीय कमिटी बैठकको मिति तोकेर टुङ्ग्याउने तयारी थालिएको हो ।