काठमाडौं । नेपाल स्रष्टा समाजबाट यस वर्ष प्रदान गरिने योगमाया राष्ट्रिय नारी स्रष्टा सम्मान, योगमाया न्यौपाने अभियन्ता राष्ट्रिय सम्मान र दमन्ता खनाल स्मृति नारी स्रष्टा सम्मानको घोषणा गरिएको छ ।
समाजबाट २०७७ सालमा प्रदान गरिने उक्त सम्मानहरु वरिष्ठ साहित्यकार तथा प्राज्ञ माया ठकुरीका संयोजकत्वमा सम्बन्धित विज्ञ तथा सम्मान संस्थापकहरू रहेको समिति यही असार १४ गते निर्णय गरेको हो ।
समितिले योगमाया राष्ट्रिय नारी स्रष्टा सम्मान (राशि रु २५ हजार १११ सहित) तोया गुरुङ, योगमाया न्यौपाने अभियन्ता राष्ट्रिय सम्मान (राशि रु २५ हजार १११ सहित) उत्तमप्रसाद पन्त र दमन्ता खनाल स्मृति नारी स्रष्टा सम्मान (राशि रु ११ हजार १११ सहित) इन्द्रा गहतराजलाई प्रदान गर्ने निर्णय गरेको हो ।
महामना नारी योगमायाले आफ्ना ६८ अनुयायीका साथ विसं १९९८ मा उत्सर्ग गरेको दिन असार २२ गतेलाई समाजले योगमाया दिवससमेत घोषणा गरी सोही दिन उनका नाममा दुई सम्मानहरु प्रदान गर्ने गरिएको छ ।
यसैगरी दमन्ता खनाल स्मृति नारी स्रष्टा सम्मान गत वैशाख ९ गते नै प्रदान गरिने तय भएकामा कोभिड–१९ को सङ्क्रमणका कारण स्थगन गरिएको समानका अध्यक्ष विधान आचार्यले जानकारी दिए । समाजले सम्मानित भएका विशिष्ट साधक तथा सर्जकहरूलाई अनुकूल अवस्थामा सम्मान प्रदान गरिने जनाएको छ । - रासस