विराटनगर । झापाको भद्रपुरमा अस्थायी कोभिड १९ अस्पताल निर्माण गर्न स्थानीय सहमत भएका छन् । प्रदेश १ मा अहिले सबैभन्दा धेरै संक्रमित भएको जिल्ला झापा हो । त्यहाँ कचनकवल गाउँपालिकामा मात्र एक सय संक्रमित फेला परेका छन् । 

प्रारम्भमा अस्थायी कोरोना उपचार अस्पताल बनाउने विषयमा जनस्तरबाट विरोध भएको थियो । तर, विश्व स्वास्थ्य संगठन (डब्ल्यूएचओ) ले तोकेको मापदण्डअनुसार अस्पताल निर्माण हुने भए आपत्ति नहुने भन्दै स्थानीयले सहमति जनाएका छन् । भद्रपुरस्थित मेची अञ्चल अस्पतालको निर्माणाधीन भवनमा अस्पताल सञ्चालन गर्न भनिएको छ । प्रदेश १ का मुख्यमन्त्री शेरधन राईले प्रदेशसभालाई सम्बोधन गर्दै झापामा आइसोलेसन बेड थपेर कोरोना उपचार केन्द्र सञ्चालन गर्ने जानकारी गराएका थिए । त्यहाँ दुई सय बेडको अस्पताल सञ्चालन गर्ने सरकारको तयारी छ । तर, स्थानीयले भने संक्रमण समुदायमा फैलने भन्दै विरोध गरेका थिए ।

स्थानीय रूपमा छलफल गरी गठन गरिएको कोरोना अस्पताल नागरिक सरोकार समाज मेचीले आपत्ति जनाउँदै विरोध गरेको थियो । तर, डब्ल्यूएचओको मापदण्डअनुरूप अस्पतालको निर्माण गर्न आग्रह गरिएको बताउँदै समाजका संयोजक भक्त खवासले भने, “हाम्रै जिल्लामा अधिक संक्रमित देखिएका छन् । अब विरोध गर्नुभन्दा पनि सुरक्षित तरिकाले अस्पताल सञ्चालन होस् भन्ने हाम्रो पनि चाहना छ ।” मेची अस्पतालको साटो अलग्गै भवनमा कोरोना अस्पताल बनाए आपत्ति नहुने उनले स्पष्ट गरे ।

वरिपरि संक्रमण फैलिने त्राससँगै मेची अस्पतालमा आउने विपन्न परिवार सेवाबाट वञ्चित गर्न नहुने आफूहरूको ठहर भएको खवासले बताए । जिल्ला कोरोना भाइरस संक्रमण रोकथाम, उपचार तथा नियन्त्रण समितिले सर्वपक्षीय छलफलबाटै मेची अस्पतालको निर्माणाधीन भवनमा कोरोना उपचार केन्द्र र जनस्वास्थ्य कार्यालयको तालिम भवनमा पीसीआर परीक्षणको प्रयोगशाला बनाउन निर्णय गरिसकेको छ । तर, नयाँ भवनमा कोरोना उपचार केन्द्र बन्ने भएपछि स्थानीयबाट विरोध भएको थियो । 

प्रदेशसभामा नेकपाका सांसद श्रीप्रसाद मैनालीले पनि संक्रमितको संख्या बढेसँगै विशेष सेवासहितको उपचार सेवा र परीक्षणका लागि झापामै पीसीआर ल्याब सञ्चालन गर्न प्रदेश सरकारको ध्यानाकर्षण गरेका थिए । मैनाली भन्छन्,“उतै परीक्षण गर्ने प्रबन्ध भयो भने तुरुन्त रिजल्ट थाहा हुन सक्छ । यसबाट उपचारमा पनि सहजता आउँछ ।”

भद्रपुबासीले स्थानीसँग छलफल नै नगरी एकलौटी ढङ्गले निर्णय भएको भन्दै विरोध गरेका थिए । भद्रपुर नगरपालिकाका पूर्वप्रमुख भारततेन्दुकुमार मल्लिक कोरोना अस्पताल झापावासीका लागि आवश्यक रहेको बताउँदै भन्छन्, “झापाका बिरामी उपचार गर्न अस्पताल त चाहिएकै छ । तर निर्माणाधीन भवन वा अर्को कुन स्थान भन्ने सोचविचार गरी सहमतिसाथ निर्णय हुनुपर्छ ।”

झापामा अहिलेसम्म १११ जना कोरोना संक्रमित फेला परिसकेका छन् । उनीहरूको धरान र विराटनगरमा उपचार भइरहेको छ । वस्तुस्थिति बुझ्न प्रदेश १ का मुख्यमन्त्री शेरधन राई आइतबार झापा पुगेका थिए ।

क्याप्सन : कोभिड अस्पताल सञ्चालन गर्ने भनिएको मेची अस्पतालको निर्माणाधीन भवन ।