काठमाडौं । पार्टी उपाध्यक्ष वामदेव गौतमबारे माथापच्ची चलिरहँदा वागमती प्रदेश कमिटीले आयोजना गरेको कार्यक्रममा अध्यक्ष पुष्पकमल दाहाल प्रचण्डले भनेका थिए– “हामी दुई अध्यक्ष विवाद पनि गर्छौं । मिल्छौं पनि । हामी विभाजित हुँदैनौं ।”

फागुन १४ गतेको सचिवालय बैठकको निर्णय कार्यान्वयन गर्ने विषयमा पार्टीभित्र अन्तरविरोध पैदा भएको थियो । सचिवालयको निर्णयका सन्दर्भमा पार्टीका नेतापिच्छेका अलगअलग व्याख्या र विश्लेषणले कार्यकर्ता अन्योलग्रस्त थिए । नेतृत्व तहमा देखिएको विवाद तलतल सङ्क्रमण हुने खतरा थियो ।

अध्यक्ष केपी शर्मा ओलीसँगै उभिएर अध्यक्ष प्रचण्डले हामी मिल्छौं । विवाद पार्टीको जीवन हो भनिदिएपछि ढुक्क देखिएका थिए । पार्टीभित्रको विवाद मत्थर भइसकेको विश्वास गर्दै तालीले स्वागत पनि गरे ।

यथार्थमा भने दुई अध्यक्षको मन सङ्लिन सकेको छैन । उपाध्यक्ष वामदेवलाई रिक्त रहेको राष्ट्रियसभा सदस्य पदमा मनोनीत गर्ने निर्णय अन्योलमै रहेका बेला प्रधानमन्त्री ओली अस्पताल भर्ना भए, मिर्गौला पुनः प्रत्यारोपणका लागि ।

२०६४ साल साउनमा भारतको नयाँ दिल्लीस्थित एपोलो अस्पतालमा प्रत्यारोपण गरिएको मिर्गौलाले काम गर्न छाडिसकेको थियो । नियमित डायलाइसिस अथवा प्रत्यारोपण विकल्प बनेको थियो ।

प्रधानमन्त्री ओलीले प्रत्यारोपणको समय यही छाने । १९ गते अस्पताल भर्ना भए । अस्पताल बसाइले दुई अध्यक्ष बीच झाँगिदो कटुतालाई हार्दिकतामा बदल्ने विश्वास लिइएको थियो । स्वास्थ्यसँग भावनात्मक साइनो हुनाले पार्टीभित्रको विवाद निरुपण हुने विश्वास पनि लिइएको थियो ।

तर, यथार्थ त्यस्तो देखिएन ।

अस्पताल भर्ना भएकै दिन राति प्रचण्ड प्रधानमन्त्री ओलीलाई भेट्न अस्पताल पुगेका थिए । त्यसपछि उनले स्वास्थ्यबारे चासो नदेखाएको भन्दै प्रधानमन्त्रीको चित्त दुखाइ रहेको बालुवाटारनिकट नेता बताउँछन् ।

प्रधानमन्त्री ओली अस्पताल भर्ना भएपछि अध्यक्ष प्रचण्ड पनि सार्वजनिक कार्यक्रममा सहभागी भएनन् । सङ्क्रामक रोग कोभिड–१९ (कोरोना)को असर विश्वव्यापी बढ्दो थियो । नेपालमा सङ्क्रमित फेला नपरे पनि उच्च सतर्कता, सावधानी अपनाउन जरुरी देखिएकाले प्रचण्ड बाहिरफेरका कार्यक्रममा निस्किएनन् । 

यही बीचमा प्रचण्डलाई पनि मर्की देखिएकाले सार्वजनिक कार्यक्रममा सरिक नभएको उनको सचिवालयले बताएको थियो ।

प्रधानमन्त्री भेट्न नपाए पनि अस्पताल पुगेर स्वास्थ्य अवस्था बुझ्नेसम्म नगरेको गुनासो प्रधानमन्त्रीको सचिवालयले गरेको छ ।

“जापान, भारत, पाकिस्तान, भुटानलगायतका देशका प्रधानमन्त्री, युरोपेली देशका राजदूत, नेपालस्थित वैदेशिक नियोग प्रमुखहरूले शुभकामना सन्देश पठाउने, पार्टीका सहधर्मी अध्यक्षले भेट्नसमेत नआउने अवस्था देखियो,” प्रधानमन्त्रीका सचिवालयमा रहेका एक नेताले बाह्रखरीसँगको कुराकानीमा भने ।

प्रधानमन्त्री १२ औं दिनका दिन शुक्रबार अस्पतालबाट डिस्चार्ज भए । डिस्चार्ज भएको भोलिपल्ट अर्थात् शनिबार बिहान मात्रै उनको स्वास्थ्य अवस्था बुझ्न प्रचण्ड बालुवाटार पुगेको सचिवालयले जानकारी दिएको छ ।

“शनिबार बिहान उहाँहरूबीच सामान्य कुराकानी भयो । स्वास्थ्य अवस्था बुझ्ने काम भयो । तर, उहाँले अस्पतालमै गएर नियमित स्वास्थ्य अवस्था बुझ्ने, उपचारमा संलग्न चिकित्सकलाई धन्यवाद दिने, प्रधानमन्त्रीको मिर्गौला प्रत्यारोपणपश्चात् चिकित्सकहरूको बढेको मनोबल अझ उकास्ने काम गर्नुपथ्र्यो, हाम्रो अपेक्षा यही थियो,” प्रधानमन्त्रीका सचिवालय सदस्य भन्छन् ।