काठमाडौं । १३औँ सागमा पदक विजेता खेलाडीहरूले सरकारले घोषणा गरेको पुरस्कार रकम दश दिनभित्र पाउने राष्ट्रिय खेलकुद परिष्दका सदस्य सचिव रमेश सिलवालले बताएका छन् । उनले खेलकुद मन्त्रालयले रकम उपलब्ध नगराउँदा खेलाडीले रकम नपाएको बताए ।

सिलवालले सरकारले पैसा उपलब्ध गराउएको भोलिपल्टै खेलाडीको हातमा आउने बताए । सदस्य सचिव सिलवालले साग सकिएको एक महिनापछि सबै खेलाडीले पुरस्कार रकम पाउने घोषणा गरेका थिए । खेलकुद मन्त्रालयबाटै पुरस्कार रकम नआउँदा खेलाडीलाई रकम दिन नसकेको सिलवालले बाह्रखरीलाई बताए ।

“खेलकुद मन्त्रालयबाटै पुरस्कार रकम आएको छैन । आउनेबित्तिकै हामीले खेलाडीलाई दिन्छौं । विभिन्न सरकारी कामले गर्दा हस्तान्तरणमा ढिलाइ भएको हो । अबको दश दिनभित्र पुरस्कार बाँडिसक्छौं,” सिलवालले भने ।

सागमा नेपालले ५१ स्वर्ण, ६० रजत तथा ९५ कास्यसहित २०५ पदक जित्न सफल भएको थियो । नेपाली खेलाडीले गरेको मिहिनेत र सफलतालाई प्रोत्साहन गर्दै प्रधानमन्त्री केपी ओलीले गत मंसिर २५ गते नेपाली खेलाडीहरूलाई पुरस्कारको घोषणा गरेका थिए ।

ओलीले एक स्वर्ण विजेताले ९ लाख, दुईभन्दा बढी जित्नेले एक स्वर्ण बराबर ११ लाख प्राप्त गर्ने तथा रजत विजेताले ६ लाख र कास्य विजेताले ३ लाख प्राप्त गर्ने घोषणा गरेका थिए ।