काठमाडौं । नेपाल प्रिमियर लिग (एनपीएल)मा कर्णाली याक्सविरुद्ध लक्ष्य पछ्याइरहेको जनकपुर बोल्ट्सले पावरप्लेमा खराब सुरुआत गरेको छ ।

बिहीबार कीर्तिपुरस्थित त्रिवि क्रिकेट मैदानमा कर्णालीले दिएको ११९ रनको लक्ष्य पछ्याइरहेको जनकपुरले ६ ओभरको समाप्तिमा २६ रन जोड्दा तीन विकेट गुमाएको छ । जनकपुरबाट हाल क्रिजमा रहेका हर्ष थाकेर र आकाश त्रिपाठी क्रमशः चार र नौ रनमा खेलिरहेका छन् ।

त्यसअघि, टस हारेर ब्याटिङमा उत्रिएको कर्णालीले निर्धारित २० ओभरमा नौ विकेट गुमाएर ११८ रन बनाएको थियो ।

जनकपुर लिग चरणको दोस्रो स्थानमा रहँदै प्लेअफमा आएको हो । पहिलो क्वालिफायरमा सुदूरपश्चिम रोयल्ससँग हार व्यहोरेपछि जनकपुरले दोस्रो क्वालिफायर खेल्नुपरेको हो ।

यो खेलमा जित निकाल्ने टिमले उपाधिका निम्ति आउँदो शनिबार सुदूरपश्चिम रोयल्सविरुद्ध प्रतिस्पर्धा गर्नेछ । सुदूरपश्चिमले पहिलो प्लेअफमा जनकपुरलाई आठ विकेटले निराश बनाउँदै फाइनल यात्रा तय गरिसकेको छ ।

लिग चरणबाट चौथो स्थानमा रहँदै प्लेअफमा आएको कर्णालीले भने इलिमिनेटरमा चितवन राइनोजविरुद्ध २१ रनको जित निकाल्दै दोस्रो क्वालिफायरमा स्थान बनाएको हो ।