काठमाडौं । नेपाल उद्योग परिसंघले सार्वजनिक निकायमा स्वदेशी वस्तुहरूको प्रयोग अनिवार्य गर्ने सरकारको निर्णयको स्वागत गरेको छ । सरकारको निर्णयले स्वदेशी उत्पादन प्रवर्धन गर्न निकै सहयोग पुग्ने परिसंघको विश्वास छ ।

उद्योग, वाणिज्य तथा आपूर्ति मन्त्रालयको सिफारिसमा नेपाल सरकारले मंसिर २८ गतेको मन्त्रिपरिषद् बैठकबाट ‘सार्वजनिक निकायमा स्वदेशी वस्तुको प्रयोग गर्ने निर्देशिका, २०८१’ पारित गरेको छ । यसले समग्र निजी क्षेत्रलाई उत्साहित बनाएको परिसंघले बताएको छ ।

परिसंघले नेपाल सरकार, उद्योग, वाणिज्य तथा आपूर्ति मन्त्रालयसँग २०७८ असार १० गते साँझेदारीपत्रमा हस्ताक्षर गरी 'मेक इन नेपाल' स्वदेशी अभियान सञ्चालन गरिरहेको छ ।

स्वदेशी वस्तु तथा सेवाको उत्पादन, उपभोग र निर्यात प्रवर्धन गर्ने मुख्य उद्देश्यले राखेर अघि बढाइएको 'मेक इन नेपाल' कार्यान्वयनमा सरकारले बलियो साथ एवम् साझेदारी प्रस्तुत गरेको परिसंघले जनाएको छ ।

"सम्माननीय प्रधानमन्त्री केपी शर्मा ओली नै प्रधानमन्त्री हुनुभएको बेलामा २०७७ फागुनमा यो अभियानको औपचारिक सुरुवात भएको थियो । परिसंघले सरकारी तथा सार्वजनिक निकायमा स्वदेशी वस्तुहरूको प्रयोग अनिवार्य गर्न आग्रह गर्दै आइरहेको छ । सरकारको पछिल्लो निर्णयले स्वदेशी अभियानले राखेको लक्ष्य हासिल गर्न महत्त्वपूर्ण भूमिका खेल्ने हाम्रो विश्वास छ," परिसंघले बताएको छ ।