काठमाडौं । कृषि विकास बैंक र प्रभु बैंकले चालु वर्षको पहिलो ६ महिनाको वित्तीय विवरण सार्वजनिक गरेका छन् । मंलगबार प्रकाशित अपरिस्कृत विवरणअनुसार कृषि विकास बैंकले अघिल्लो वर्षको यही अवधिभन्दा २२ दशमलब ८ प्रतिशत बढी नाफा गरेको छ भने प्रभुले ४ दशमलब २३ प्रतिशत नाफा बढाएको हो ।

कृषि विकास बैंक

कृषि विकास बैंकले ६ महिनामा १ अर्ब ५८ करोड १७ लाख रुपैयाँ खुद नाफा गरेको छ । अघिल्लो आवको यही अवधिमा बैंकले १ अर्ब २८ करोड ८० लाख नाफा कमाएको थियो ।

वित्तीय परिसूचकअनुसार बैंकको निस्क्रिय कर्जामा सुधार गर्दा नाफा गरेको देखिन्छ । विवरणअनुसार बैंकको ब्याज आम्दानी घटे पनि सञ्चालन मुनाफा बढेको छ । यसमा खराब कर्जा घट्दा नाफामा टेवा पुगेको हो ।

६ महिनामा बैंकको ब्याज आम्दानीमा अघिलो आवभन्दा ९ दशमलब २५ प्रतिशतले कमी आएर ३ अर्ब १७ करोड १६ लाख रुपैयाँमा सीमित भएको छ । सञ्चालन मुनाफा भने १६ दशमलब शून्य ८ प्रतिशतले बढेर १ अर्ब ९८ करोड ४४ लाख रुपैयाँ पुगेको छ ।

समीक्षा अवधिमा बैंकको निस्क्रिय कर्जा ४ दशमलब ५ प्रतिशतबाट घटेर ३ दशमलब ९१ प्रतिशतमा पुगेको छ ।

बैंकले यस अवधिसम्म १ खर्ब २७ अर्ब २१ करोड निक्षेप संकलन गरेर १ खर्ब १५ अर्ब ३६ करोड रुपैयाँ कर्जा लगानी गरेको छ ।

बैंकको नाफा बढसँगै प्रतिसेयर आम्दानीमा पनि उल्लेख्य सुधार सुधार भएको छ । गत आर्थिक वर्षको पुस मसान्तसम्ममा २४ रुपैयाँ ९६ पैसा रहेको बैंकको प्रतिसेयर आम्दानी चालु वर्षको सोही अवधिमा ६ रुपैयाँ ५१ पैसा बढेर ३१ रुपैयाँ ४७ पैसा कायम भएको छ ।

प्रभु बैंक

प्रभु विकास बैंकले ६ महिनामा १ अर्ब ८ करोड ५७ लाख रुपैयाँ खुद नाफा गरेको छ । अघिल्लो आवको यही अवधिमा बैंकले १ अर्ब ४ करोड १७ लाख नाफा कमाएको थियो ।

वित्तीय परिसूचकअनुसार बैंकको निस्क्रिय कर्जामा बढ्दा नाफा उल्लेखनीय मात्राले नबढेको देखिन्छ । विवरणअनुसार बैंकको ब्याज आम्दानी १४ र सञचालन मुनाफा १२ प्रतिशतले बढेको छ ।

६ महिनामा बैंकको ब्याज आम्दानीमा अघिलो आवभन्दा १४ दशमलब १२ प्रतिशतले बढेर २ अर्ब ४५ करोड ७१ लाख रुपैयाँ पुगेको छ । सञ्चालन मुनाफा पनि १२ दशमलब ९४ प्रतिशतले सुधारिएर १ अर्ब ५० करोड ९२ लाख रुपैयाँ पुगेको छ ।

समीक्षा अवधिमा बैंकको निस्क्रिय कर्जा २ दशमलब ४७ प्रतिशतबाट बढेर ३ दशमलब १२ प्रतिशतमा पुगेको छ ।

बैंकले यस अवधिसम्म १ खर्ब १५ अर्ब ५० करोड निक्षेप संकलन गरेर ८४ अर्ब ७१ करोड रुपैयाँ कर्जा लगानी गरेको छ ।

बैंकको नाफा बढे पनि प्रतिसेयर आम्दानी भने घटेको छ । गत आर्थिक वर्षको पुस मसान्तसम्ममा २९ रुपैयाँ ७ पैसा रहेको बैंकको प्रतिसेयर आम्दानी चालु वर्षको सोही अवधिमा ६ रुपैयाँ ९५ पैसा घटेर २२ रुपैयाँ १२ पैसा कायम भएको छ ।