काठमाडौं । यस साता पुँजी बजारमा उछाल आयो । शेयर बजार परिसूचक नेप्से सहित कारोबार परिमाणमा पनि उल्लेख्य वृद्धि आयो । 

नेप्से ९७ अंकले बढ्दा करिब १ खर्ब ५० अर्ब रुपैयाँ लगानीकर्ता कमाए । यो साता कम्पनीहरुको शेयर मूल्यमा उच्च वृद्धि हुँदा लगानीकर्ताको सम्पत्ति १ खर्ब ४९ अर्ब ५३ करोडले बढेको हो । अर्थात बजार पूँजीकरण १५ खर्ब ४६ अर्बबाट बढेर १६ खर्ब ९६ हजार रुपैयाँ पुगेको छ । 

साताभर नेप्से पनि ९७ दशमलव ११ अंकले बढेर १३ सय अंक पार गर्‍यो । अघिल्लो साताको बिहीबार १ हजार २ सय १३ दशमलव १२ अंकमा बन्द भएको नेप्से यो साता ९७ अंकले बढेर १ हजार ३ सय १० दशमलव २३ अंकमा बन्द भयो । सेन्सेटिभ परिसूचक पनि यो साता १८ दशमलव ६१ अंकले बढेर २ सय ८२ दशमलव ८८ अंकमा पुग्यो । 

कारोबार रकममा पनि यो साता ५७ दशमलव ९ प्रतिशतले वृद्धि भयो । यो साता ६ अर्ब ६७ करोड २० लाख रुपैयाँ बराबरको शेयर कारोबार भयो । सो क्रममा २ करोड ११ लाख ९७ हजार कित्ता सेयर खरिद विक्री भए । अघिल्लो साता ४ अर्ब २२ करोड ५५ लाखको शेयर कारोबार भएको थियो । 

यो साता सबैभन्दा बढी कारोबार एनआइएसी एसिया बैंकको भएको छ । यो बैंकको २६ करोड ७६ लाख रुपैयाँ बराबरको शेयर करोबार भयो । त्यस्तै शिवम सिमेन्टको शेयरको कारोबार २२ करोड ५३ लाखको कारोबार भयो । २० करोडभन्दामाथिको शेयर कारोबार हुने कम्पनीहरुमा नेपाल लाइफ इन्स्योरेन्स (२२ करोड २६ लाख) र हिमालयन डिस्टिलरी (२१ करोड ९ लाख) रहेका छन् ।

यो साता नेपाल स्टक एक्सचेन्जमा ग्लोबल आइएमई बैंकको ७ करोड २० लाख ८७ हजार कित्ता शेयर सूचिकृत भएको छ । बैंक मर्ज भएपछि यो बैंकको शेयर पुनः सूचिकृत भएको हो । त्यस्तै सिर्जना फाइनान्सको २७ लाख ६४ हजार कित्ता हकप्रद शेयर पनि सूचिकृत भए ।