काठमाडौं । नेपाल-अमेरिका अन्तर्राष्ट्रिय चलचित्र महोत्सवको चौथो संस्करण २०२० मा आयोजना हुने भएको छ ।

अमेरिकाको मेरिल्याण्ड राज्यमा स्थापित गैरनाफामुलक संस्था ‘नेपाल-अमेरिका फिल्म सोसाइटी’ले सन् २०१७ देखि प्रत्येक वर्ष यो महोत्सवको आयोजना गर्दै आएको छ । वासिङ्टन डिसी महानगर क्षेत्रमा केन्द्रित रहेर आयोजना गरिने चौथो संस्करण यही जुन २६ देखि २८ सम्म चल्नेछ ।

महोत्सवको लागि विश्वभरिबाट आवेदन खुला गरिएको छ । जसमा इच्छुकले अनलाइनमार्फत आवेदन दिन सकिने व्यवस्था गरिएको छ । 
 
महोत्सवसमा नेपालका फिचर फिल्म, वृत्तचित्र, छोटा चलचित्र, एनिमेशनका साथै सबै विधाका चलचित्रहरु प्रदर्शन गरिने छन् । प्रदर्शन गरिएका मध्येबाट उत्कृष्ट चलचिहरुलाई पुरस्कारको पनि व्यवस्था गरिने छ ।

चलचित्र प्रदर्शनीसँगै संस्कृति र नयाँ प्रविधिबारे प्यानल छलफल तथा कार्यशालाहरु पनि आयोजना हुनेछन् भने उपस्थित निर्देशक, निर्माता तथा कलाकारसँग अन्तरक्रिया कार्यक्रम पनि राखिने जानकारी दिएका छन् ।

यो चलचित्र महोत्सवमार्फत नेपाली मात्र नभई अमेरिकामा रहेका अन्तर्राष्ट्रिय डायस्पोराको साझा मञ्‍चको रुपमा स्थापित गराउने लक्ष्य आयोजकको छ ।

गत जुन महिनामा सम्पन्न तेस्रो संस्करणमा निर्देशक बिनोद पौडेलको ’बुलबुल’ उद्धघाटन चलचित्र र निर्देशक प्रवीन स्याङ्गबोको चलचित्र ’कथा’७२ ’ समापनमा प्रदर्शन भएको थियो ।