सिड्नी । पोखराको बसपार्कबाट खेलुकद र परोपकारी अभियानलाई अघि बढाउँदै अन्तर्राष्ट्रिय स्तरमा आइपुगेको सहारा क्लबको मेलवर्न शाखा पनि गठन भएको छ । 

बेलायत, हङकङ र अस्ट्रेलियासम्म फैलिएको सहारा अष्ट्रेलियाले क्लबलाई अस्ट्रेलियाको सबै राज्यमा अगाडि बढाउने नीतिबमोजिम भिक्टोरिया राज्यको मेलबर्नमा शाखा विस्तार गरिएको क्लबका अध्यक्ष सिद्धार्थ पौडेलले बताए । 

सहारा मेलबर्न गठन गर्दा क्लबको गतिविधि र यसको प्रभाव बढाउनु नै यसको प्रमुख उद्देश्य रहेको अध्यक्ष पौडेलले बताए । 

सहारा मेलबवर्नमा सज्जन शर्मा र सागर शाहीको संयुक्त नेतृत्वमा पुस्कर कार्की, सुन्दर कार्की, नवीन प्रधान, विक्की कार्की, सौगात कार्की, नितिन श्रेष्ठ र रविन्द्रराज रेग्मी रहेका छन् । 

सहारा अस्ट्रेलियाले सिड्नीमा प्रत्येक वर्ष सहारा कप फुटबलका साथै विविध सामाजिक कार्यमा हात अघि बढाउँदै आएको छ । 

‘‘सहारालाई अस्ट्रेलियाको सबै राज्यमा पुर्‍याउने हाम्रो उद्देश्य हो, सहारा क्लबका असल कर्मको लागि निकट भविष्यमा पनि अन्य राज्यमा गठन गर्ने तयारी भइरहेको छ,’’ कोषाध्यक्ष कल्याण खड्काले बताए । 

हुन त एन्फा अस्ट्रेलियाले समेत अन्य राज्यमा शाखा विस्तार गर्न नसकेको परिप्रेक्ष्यमा सहाराको विस्तारलाई निकै महत्त्वका साथ हेरिएको छ ।
 
बेसहाराहरूको सहारा बनेर पोखराबाट खेलुकदमा चम्किएको सहाराले आफ्नै एकेडेमी चलाउनुका साथै मोफसलको ठूलो फुटबल प्रतियोगिता आहा रारा गोल्ड कपलगायत विविध सामाजिक काम गर्दै आएको छ ।