काठमाडौं । साढे तीन वर्षदेखि आईसीसीको निलम्बनमा रहेको नेपाल क्रिकेट संघ (क्यान)ले नयाँ नेतृत्व पाएको छ । नयाँ नेतृत्वसँगै लामो समयदेखिको निलम्बन फुकुवा हुने सम्भावना छ । 
यसै साता सम्पन्न निर्वाचनमा पूर्वअध्यक्ष विजयराज पाण्डेलाई पराजित गर्दै चतुरबहादुर चन्द अध्यक्षमा निर्वाचित भए । यसअघि उनी २०७२ सालमा अध्यक्षमा निर्वाचित भएको चार महिना नबित्दै आईसीसीले राजनीती हाबी भएको भन्दै नेपाललाई निलम्बन गरेको थियो । 

आफ्नै पालाामा निलम्बनको पीडा र फुकुवाका लागि अवसर पाएका क्यानका नवनिर्वाचित अध्यक्ष चन्द आगामी चार वर्षका लागि उत्साहित छन् । उनको चुनावी एजेन्डा नै निलम्बन फुकुवा गराउने रहेको थियो ।
क्यानको निलम्बन पछि थाती रहेका कामकारबाही अगाडि बढाउनु पर्ने चुनौतीमा रहेका चन्द क्रिकेटमा ‘सिस्टम’ बसाल्ने बताउँछन् । 

चन्दको पूरै प्यानल विजय भएसँगै नयाँ नेतृत्वले कसरी नेपाली क्रिकेटलाई अगाडि लैजाला भन्ने क्रिकेट समर्थक र सरोकारवालामा चासो छ । अर्काे विषय नेपाली खेलाडी छनोट, चलिरहेका घरेलु लिग, नेपाली क्रिकेटमा बढ्दो राजनीति, नयाँ क्रिकेट स्टेडियम निमार्णमा  नयाँ नेतृत्वको भूमिका के भन्ने पनि छ ? तर, यी सबै विषयवस्तुलाई सहज ढंगले अगाडि लैजाने क्यानका अध्यक्ष चन्दको दाबी छ । साथै उनी चुनावमा पराजित पक्षसँग परामर्श गरी अघि बड्ने बताउँछन् ।  

“चुनाव जितेपछि मेरो मुख्य एजेण्डा भनेको आईसीसीको निलम्बन फुकुवा गर्ने हो । हामीले आईसीसीको रोडम्याप अनुसार नै काम गरेका छौँ । आशा छ निलम्बन फुकुवा हुनेछ । त्यसपछिका मेरा नयाँ योजनाहरुले सार्थकता पाउनेछन् । चुनावपछि पराजित पक्षले पनि मलाई सहयोग गर्ने वाचा गरेको छ । त्यसकारण पनि हाम्रो नेतृत्वलाई सहज छ,” चन्दले भने । 

यसअघि २०७२ सालमा आईसीसीले क्यानमा सरकारी हस्तक्षेप भएको भन्दै निलम्बन गरेको थियो । उक्त समयमा पनि चन्द नेतृत्वमा थिए । त्यो समयमा क्यानको चुनावमा कुनै खाले राजनीति नभएको र सरकारी हस्तक्षेप देखाउँदै आईसीसीले निलम्बन गरेको चन्द बताउँछन् । “क्यानको चुनावअघि जो जुन पार्टी वा राजनीतिसँग जोडिएको भए पनि नेतृत्वमा आएपछि सबै क्यानको मात्र हुन्छ । हामी क्यानका मान्छे हौँ, नेपाली क्रिकेटको विकासको लागि आएका हौँ । कुनै राजनीतिक विषयवस्तु हाम्रो लागि चासोको विषय होइन । क्यानमा पनि कुनै खाले राजनीतिक विषय जोडिने छैन,” चन्दले भने । 

क्यान निलम्बनमा रहँदा खेलाडी छनोटको कुनै आधार नरहेको बताएका उनले खेलाडी छनोटको आधार तय गर्ने बताएका छन् । राष्ट्रिय क्रिकेट टोलीसँगै एउटा ब्याकप टोली पनि बनाउने उनको जिकिर छ । 

“निलम्बनपछि खेलाडी छनोटको केही आधार नै छैन । मनोमानि ढंगले खेलाडी छनोट गरिएको छ । अब व्यवस्थित ढंगले खेलाडी छनोट गर्छाैँ । त्यसो गर्दा सबै खेलाडीले टिममा स्थान बनाउनेछन् । हामीले राष्ट्रिय टोली र यू–२३ को लागि ४० जना जति खेलाडी तयार पार्ने योजना बनाएका छौँ । जसले राष्ट्रिय टोलीमा खेलाडीको कमी भएपछि यू–२३ ले स्थान बनाउने छन्,” चन्दले भने ।  

क्यानको नयाँ नेतृत्वले नेपालमा चल्ने घरेलु लिगहरु पनि नीतिगत रुपमा सञ्चालनमा ल्याउने बताएका छन् । साथै उनले हाल जुन लिगहरु जस्तो तरिकाले सञ्चालन भएपनि क्यानको निलम्बन फुकुवा भएसँगै उनीहरुले क्यानको विधान अनुसार लिगहरु सञ्चालनमा ल्याउने बताए । 

उनले भने,“क्यानको निलम्बनको समयमा धेरै क्रिकेट लिगहरु सञ्चालनमा आएका छन् । लिगहरुले मनोमानी ढंगले पुरस्कार रकम पनि दिन थालेका छन् । यो सबै कुरा हुनु हुँदैन भन्ने छैन तर यो सबै प्रकृयागत रुपमा जावस र क्यानको नियम बमोजिम सञ्चालन हुन्छ ।”