काठमाडौं । आकांक्षा पलायो, उनले आँटिन् । चित्त नबुझ्नेले हतोत्साही गर्ने प्रयास गरे । तर उनले हारिनन् । अन्ततः सपना साकार भयो । कीर्तिमान कायम भयो । संसारकै लामो नृत्यको । गिनिज वुक अफ दि वर्ल्र्ड रेकर्डस्मा नाम लेखियो । सपनाहरु कहाँ स्थिर हुँदारहेछन् र ? आकांक्षाहरु कहाँ सीमित हुँदारहेछन् र ? पत्रैपत्रको सयपत्री फूल जस्तै एउटा उप्किए पनि अर्को आउने । 

सबैभन्दा लामो नृत्यको इतिहास रचिन् बन्दना नेपालले । रहर फेरि झाँगियो । नयाँ कीर्तिमानको तयारीमा छिन् उनी । सबैभन्दा लामो समय माटोको घैंटामाथि नाचेर विश्व कीर्तिमान बनाउने योजनामा छिन् बन्दना । आत्मविश्वास सबैभन्दा ठूलो कुरा मान्ने बन्दना नयाँ रेकर्डका लागि हार नमान्ने बताउँछिन् । उनलाई थाहा छ पहिलो रेकर्ड पनि सजिलै बनेको होइन । खुट्टा दुखे । सुन्निए । तर पनि हार नमानी उनले आफूलाई आफ्नो उद्देश्यमा हिँडाइरहिन् । त्यही मेहनत दोहोर्याउँदै नयाँ इतिहासको खोजीमा छिन् उनी । 

केही वर्षअघि बन्दना भारतमा नृत्य सिक्न गइन् । उनको लक्ष्य नृत्य सिक्नु मात्रै थिएन । नृत्यसँगै त्यसैमा विश्व कीर्तिमान बनाउने पनि थियो । सानैबाट नृत्यमा देशलाई विश्वमा चिनाउने लक्ष्य थियो । अन्ततः मिल्यो पनि । ०५८ सालमा काठमाडौंमा जन्मिएकी बन्दनाले २०७५ मंसिर ७ गतेबाट १२ गतेसम्म लगातार १२६ घण्टा नृत्य गर्दै विश्व कीर्तिमान राखिन् । 

पाँच वर्षको उमेरबाटै नृत्यमा रुचि राख्ने बन्दनालाई सुरुआतमा विश्व कीर्तिमान नै राख्छु भन्ने लागेको थिएन । सामान्यतया १ घण्टा नाच्दा पनि थाकेको महसुश गर्ने उनलाई त्यो समय भने थकाइले असर गरेन । कारण उनलाई देशको लागि केही गर्ने जोस चलेको थियो । १२६ घण्टामा उनले लगातार चार घण्टा नाचेपछि पाँच मिनेट आराम गर्ने समय मिल्थो । 

“पाँच वर्षको उमेरदेखि नाच्न सुरु गरेको थिएँ । त्यो समय नै नृत्यबाट देशको लागि केही गरेर देखाउँछु भन्ने लागेको थियो । मात्र कुन विधामा भन्ने तयारी गरेको थिइन । पछि धेरै लामो समय नाचेर नै विश्व कीर्तिमान राख्न सकिन्छ भन्ने थाहा पाएँ, अनि त्यसैका लागि तयारी गर्न थालेँ,” बन्दनाले भनिन् । 

बन्दनालाई नृत्यबाट नै विश्व कीर्तिमान राख्न सकिन्छ भन्ने कुरा उनका बुबाले जानकारी गराएका थिए । पारिवारिक प्रेरणाले नै नृत्यमा अब्बल बन्न सहयोग पाएकी बन्दनाले भारतमा गएर तयारी गर्न थालिन् । विषेश कक्षाका लागि भारतमा गएकी उनलाई कुन विधामा कस्तो प्रकारको नृत्यमा विश्व कीर्तिमान राख्न सकिन्छ भन्ने जानकारी भयो । धरै लामो समयसम्म नाचेर विश्व कीर्तिमान राखेको जानकारी पाएपछि उनलाई त्यसैमा चासो भयो । 

“भारतमा नृत्यको नयाँ फर्म र अन्य विधाहरु सिक्न गएको थिएँ । विश्व कीर्तिमान राख्ने विषयमा पनि जानकारी लिनु थियो । भारतकै एकजना महिला डान्सरले १२३ घण्टा नाचेर विश्व कीर्तिमान राखेको थाहा पाएँ । उनले भारतको कला र संस्कृति चिनाउने खालको गीतहरुमा नाचेकी थिइन् । मलाई पनि देशको कला, संस्कृति र पुराना लोक भाकाहरुलाई पहिचानमा ल्याउन विश्व रेकर्ड राख्ने तयारी गरेँ,” बन्दनाले भनिन् । 

पूर्व देखि पश्चिमसम्मका लोक भाका, झ्याउरे भाकाको पहिचान घट्दै गएकोमा बन्दनालाई पनि समयसमयमा चिन्ता लाग्थ्यो । उनले रेकर्ड राख्नु पूर्व पनि नेपाली लोक भाका र संस्कृतिलाई पहिचानमा ल्याउन लोक भाकामा नै नृत्य गर्ने गर्थिन् । उनको विश्व कीर्तिमान राख्नु पछिको मुख्य लक्ष्य पनि नेपाली लोक भाका र लोक संस्कृतिलाई जोगाई राख्ने र पहिचानमा ल्याउने पनि थियो । त्यसैले उनले १२६ घण्टा नाचेर कीर्तिमान बनाउने योजना बनाइन् ।

“सुरुआतमा मैले १२४ घण्टाको रेकर्ड बनाउँछु भन्ने लागेको थियो । त्यसै अनुसार तयारी गरेकी थिएँ । त्यसपछि एक मनमा लाग्यो– १०० घण्टा सम्म लगातार नाच्न सकेँ भने १२६ घण्टा कसो नसकौँला भन्ने लाग्यो । भित्री मनमा एक प्रकारको डर पनि लागेको थियो । कतै मैले बीचमा नै छाड्नुपर्यो भने के होला ? पछि पत्रकार सम्मेलन गरेर रेकर्ड राख्छु भनिसकेपछि केही समय तयारीमा जुटेँ अनि सबैबाट हौसला आयो । अनि मैले सक्छु भन्ने पनि लाग्यो,” बन्दनाले भनिन् । 

विश्व कीर्तिमान राख्ने लक्ष्यमा गएकी उनले करिब पाँच दिनसम्म नेपाली लोक गीत तथा अन्य गीतहरुमा नाच्दै १२६ घण्टाको विश्व कीर्तिमान राख्न सफल भइन् । बन्दनालाई बीचमा कीर्तिमानी लत छोड्न अनुरोघ नआएको भने होइन । तर, उनले हार भने मानिनन् । उनका बुबाले चौथो दिन ब्रेकको समयमा नृत्य गर्न छोड्न आग्रह पनि गरेका थिए ।

“रेकर्ड राख्ने सुरमा हिडेको थिएँ । प्रत्येक एक घण्टामा पाँच मिनेटको ब्रेक पनि हुन्थ्यो । त्यो समयमा धेरै पटक बेहोस पनि भएँ । साथीहरुले पानी छर्केर उठाए । चौथो दिनमा ब्रेकको समयमा डाक्टर आएर नृत्य नगर्न भनेका थिए रे । मलाई त्यो पनि जानकारी थिएन । म देशका लागि नयाँ रेकर्ड राख्छु भन्ने सोचमा नाचेकी थिएँ । अन्ततः मेरो चाहना सफल भयो,” बन्दनाले भनिन् । 

बन्दनासँग अब अन्य तीन विधाका कीर्तिमानहरु बाँकी छन् । उनले केही दिनमै नयाँ कीर्तिमानको बारेमा जानकारी दिने बताएकी छन् । उक्त कीर्तिमानमा पनि देशको पहिचानलाई झल्काउने उनको योजना छ । बाँकी अन्य कीर्तिमानमा पनि देशको पहिचानलाई विश्व सामु चिनाउने बन्दनाको योजना छ । त्यसैका तयारी उनले अहिले गरिरहेकी छन् ।