काठमाडौं । प्रधानमन्त्री केपी शर्मा ओलीले आइतबार प्रतिनिधिसभाको बैठकलाई झण्डै ४० मिनेट सम्बोधन गरे । 

गत आइतबार सिंगापुरमा उपचार गराएर फर्किए पनि प्रधानमन्त्रीको स्वास्थ्य अवस्थाका बारेमा चिन्ता छ । यद्यपि उनी भदौ पहिलो साता पुनः  फलोअपका लागि सिंगापुर जाने तयारी रहेको अपुष्ट खबर आइरहेका छन् ।

यसैले हुनुपर्छ, प्रमुख प्रतिपक्षी दलका सांसद मीनेन्द्र रिजालले संसद्मै भने– “सम्बोधनका क्रममा प्रधानमन्त्रीलाई तन्दुरुस्त देखेर म यति खुसी भएँ, प्रश्न सोध्नै बिर्सिएँछु ।

प्रधानमन्त्रीको स्वास्थ्य अवस्थाबारे जनमानसमा आशंका व्याप्त छ । तर आइतबारको सम्बोधनले प्रमुख प्रतिपक्षलगायत विपक्षी पार्टीको मात्र नभई, आम जनमानसमा रहेको भ्रम निवारण गरेको छ । प्रधानमन्त्री ओलीको आइतबारको सम्बोधनले त्यसलाई बल प्रदान गर्‍यो ।

त्यसका अतिरिक्त प्रधानमन्त्रीको सम्बोधनलाई अन्य कोणबाट पनि केलााउन सकिन्छ ।

पाँच वर्ष मै प्रधानमन्त्री !

गत जेठ १५ गते सञ्चारमाध्यमसँगको कुराकानीमा नेपाल कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ले पार्टी एकताका बेला भएको आलोपालो सरकार चलाउने सहमतिको स्मरण गरेका थिए । त्यतिमात्र नभई प्रचण्डले अबको १५ महिनापछि ओली सत्ता हस्तान्तरणका लागि तयार रहनुपर्ने धारणा खुलस्त राखेका थिए ।

त्यसले उत्पन्न गराएको तरङ्ग अझै साम्य भइसकेको छैन । पार्टी एकताको झण्डै १५ महिना व्यतीत भइसक्दा पनि एकीकरणले पूर्णता नपाउनुलाई धेरैले यसैसँग जोडेर हेर्ने गरेका छन् ।

तर, आइतबारको सम्बोधनमार्फत् ओलीले एक्लै पाँच वर्ष सरकार चलाउने सन्देश प्रवाह गरे– “पद नगएको मान्छे कोही देखेको छैन । राजा, महाराजा, सम्राट, बादशाह, जनप्रतिनिधि सबैको पद कुनै न कुनै दिन जान्छ । आगामी निर्वाचनपछि मलाई पनि बस्न मन छैन । त्यसकारण निर्वाचनसम्म धैर्य गर्न म साथीहरूलाई आग्रह गर्न चाहन्छु ।”

प्रधानमन्त्रीको आइतबारको सम्बोधनले पार्टी एकताको पूर्वसन्ध्या अर्थात् २०७५ जेठ २ गतेको सहमतिको खण्डन गरेको छ । आगामी निर्वाचनसम्म वर्तमान सरकारलाई नै निरन्तरता दिने प्रधानमन्त्रीको सम्बोधनले प्रष्ट पार्छ ।

जबकि, सहमतिको चार नम्बर बुँदामा ‘समानता र समान अवधिका आधारमा आवश्यकताअनुरूप दुवै अध्यक्षले सरकारको नेतृत्व गर्ने’ उल्लेख छ ।

राजावादीप्रति गरम, विपक्षीप्रति नरम

केपी ओली प्रमुख प्रतिपक्षीप्रति बढी नै आक्रामक देखिन्छन् । चुनावअघिको स्वभाव सत्ता सम्हालेपछि पनि बदलाव आएको छैन । संसदको सम्बोधनमा पनि प्रतिविम्बित हुँदै आएको छ ।

तर, आइतबारको सम्बोधन प्रमुख प्रतिपक्षीप्रति नरम नै थियो । सम्बोधनको शुरूआतमा गत असार ३ गते बोल्नै नपाई रोष्ट्रमबाट फर्कनुपरेको पीडा विम्बित भए पनि प्रमुख प्रतिपक्षीप्रति कटाक्ष थिएन उनको भाषणमा । बरु राजावादीप्रति खनिए ।

“जुन संस्था र शक्तिका कुरा, जुन निकायका कुरा गर्छन् । ती शक्तिहरू जिउँदै हुँदा ठेगान लगाएका हौँ । अहिले चिहानमा गएर हड्डी फुकेर ती संस्था फर्काउँछौँ भनेर उफ्रिएको देखिन्छ । यो बेमौसमको बाजा नबजाए हुन्छ । सरकारले यो उदारता देखाएको नपत्याएर हो । पत्याएका दिन संविधान, कानुन, व्यवस्थाको, प्रजातन्त्रको, गणतन्त्रको रक्षाका लागि सरकार मैदानमा उत्रन्छ,” उनले राजा फर्काउनुपर्छ भनेर सडकमा नारा लगाउने सबैलाई एकैमोठमा जवाफ दिए ।

शान्ति प्रक्रियाका बाँकी काम मेरै नेतृत्वमा पूरा हुन्छ

वर्तमान सरकारालाई बिझाइरहने मुद्दा शान्ति प्रक्रियाका बाँकी कामहरू पनि हुन् । यही थाती रहेका कामले अर्का अध्यक्ष पुष्पकमल दाहाललाई उत्तेजित पनि बनाउँछ बेलाबेला । 

गत साउन १३ गते आफ्नै निवास खुमलटारमा नेत्रविक्रम चन्द ‘विप्लव’का कार्यकर्तालाई भित्र्याउँदै उनले भनेका थिए– “हेग लगिए पनि मलाई केही फरक पर्ने छैन । हेग लगे भने त म झन् विश्वकै हिरो भएर निस्कन्छु, संसारभरिका जनताले मलाई यो त न्यायको पक्षमा रहेछ शान्तिको पक्षमा रहेछ भनेर चिन्नेछन् । त्यो त मेरो लागि गौरवको कुरा हुन्छ । तर मलाई लाग्दैन, तिनीहरूले लान्छन् र विश्वको हिरो बनाउँछन् भनेर ।” 

द्वन्द्वकालीन मुद्दा किनारा लगाउन गठित सत्य निरुपण तथा मेलमिलाप आयोग र व्यक्ति बेपत्ता छानबिन आयोग निस्क्रिय हुँदा युद्धका घाउहरू उकल्चिइरहेको थियो । त्यसबाट सबैभन्दा प्रताडित पूर्वमाओवादी केन्द्रका नेताहरु नै छन् । 

केपी ओलीले सम्बोधनका क्रममा दुवै आयोगलाई यसैसाता पूर्णता दिने बताएका छन् । “हामीले सत्य निरूपण तथा मेलमिलाप र बेपत्ता छानबिन आयोग गठनका लागि प्रमुख आयुक्त, आयुक्तहरूको सिफारिस गर्न सिफारिस समिति निर्माण गरेका छौँ । समिति क्रियाशील छ । यसै हप्ताभित्र दुवै आयोग गठन हुनेछन् । सिफारिस आउनेबित्तिकै बिनाविलम्ब गठन गर्छौँ । र, हाम्रा प्रतिवद्धताअनुरूप नै समुचित ढंगले यस विषयको शीघ्रातिशीघ्र निरुपण गर्दछौँ । समाप्त भएको द्वन्द्वको घाउमा खाटा नबस्नु, घाउ चहर्‍याउनु वाञ्छनीय हुँदैन ।”