काठमाडौं । स्कुल विभागमा दाबेदारी थुप्रिँदा नेपाल कम्युनिस्ट पार्टी (नेकपा)को एकता प्रक्रियामा नयाँ खालको उल्झन देखा परेको छ । नेकपाका केही नेताले यसलाई पार्टीको संकटपूर्ण अवस्थाका रूपमा समेत चित्रण गरेका छन् ।

पार्टी स्कुल विभागमा सचिवालय र स्थायी कमिटीका नेताहरूले दाबेदारी प्रस्तुत गरिरहँदा नेकपाका पाका नेता प्रदीप नेपालले भने बेदुराम भुसालको नाम सुझाएका छन् ।

त्यसो त भुसाल आफैँले पनि स्कुल विभाग दाबी गर्दै आएका छन् । जनताको बहुदलीय जनवादको ऐतिहासिकतामाथि विद्यावारिधि गरेका नेता भुसालले कम्युनिस्ट पार्टीको सदस्य हुन पार्टी स्कुल विभागको परीक्षा उत्तीर्ण हुनैपर्ने बताउँदै आएका छन् ।

तत्कालीन एमालेका पोलिट्ब्युरो सदस्य रहेका नेपालले पनि भुसालकै नाममा सहमति जुटाउनुपर्ने तर्क अघि सारेका छन् ।

“नेकपाका नेता कमरेडहरू ! कम्तिमा साथीहरूको योग्यता त हेर्नुहोस्, बेदुराम भुसालले स्कुल विभाग चलाउँदा त्रुटि देख्नुभएको भए नाम हटाउनुस्, होइन भने स्कुल विभागको जिम्मा खुरुक्क उहाँलाई दिनूस्,” नेपालको तर्क छ ।

स्कुल विभागमा महाभारत चर्किएको छैन

स्कुल विभागमा दाबेदारी प्रस्तुत गरिरहेका प्रवक्ता नारायणकाजी श्रेष्ठले आफूसँग नेतृत्वले कुरा नगरेकाले यसबारे धारणा राख्नु अनुपयुक्त हुने बताएका छन् । “स्कुल विभागको बारेमा अध्यक्ष केपी ओलीले केही भन्नुभएको छैन, अर्का अध्यक्ष पुष्पकमल दाहालले ‘तपाईंलाई प्रस्ताव गरेका छौँ’ भन्नुभएको थियो,” उनले बाह्रखरीसँग भने ।

उनले स्कुल विभागमा महाभारतै चर्काउनुपर्ने केही नभएको बताउँदै नेतृत्वले सहज ढंगले टुंग्याउने विश्वास व्यक्त गरे ।

‘म हुँदा पनि हुन्छ, पर्सिसम्ममा टुंगो लाग्छ’

यता पार्टी प्रमुख र प्रधानमन्त्रीसमेत भइसकेका नेकपाका चौथो वरीयताका नेता झलनाथ खनालले पर्सिसम्ममा यसको टुंगो लाग्ने जानकारी दिए । “हामी छलफलमा छौँ । उपयुक्त ढंगले जिम्मेवारी बाँडफाँट हुन्छ । पर्सिसम्म टुंगो लाग्छ,” उनको भनाइ थियो ।

स्कुल विभागमा तपाईंको पनि दाबेदारी छ र ? भन्ने जिज्ञासामा खनालले बाह्रखरीसँग भने, “म हुँदा पनि हुन्छ । हामी छलफलमै छौँ । टुंगो लागिसकेको छैन । त्यति धेरै विवाद छैन ।”

माओवादी एकमत, एमाले विभाजित

स्कुल विभागको जिम्मेवारी बाँडफाँटका सन्दर्भमा पूर्वमाओवादी केन्द्र एकमत देखिएका छ । पूर्वएमाले भने विभाजित भएको छ ।

पूर्वमाओवादी केन्द्रले पार्टीका प्रवक्ता तथा सचिवालय सदस्य नारायणकाजी श्रेष्ठलाई प्रस्ताव गरेको छ । माओवादी केन्द्रबाट राम कार्कीको नाम पनि बहसमा आएको छ । तर, प्रचण्डले नारायणकाजीकै नाममा सहमति जुटाउन खोजिरहेका छन् ।

पूर्वएमालेमा भने चारजना आकांक्षी देखा परेका छन् । झलनाथ खनाल, ईश्वर पोखरेल, घनश्याम भुसाल र बेदुराम भुसालको नाम चर्चामा छ ।

रोचक कुरा त यसमा माधव नेपाल नेपाल समूह नै विभाजित देखिएको  छ । नेपाल समूहबाट घनश्याम भुसाल र बेदुराम भुसाललाई अघि सारिएको छ । घनश्याम मार्क्सवादका अध्येता हुन् भने बेदुराम मदन भण्डारीद्वारा प्रतिपादित जनताको बहुदलीय जनवादका व्याख्याता ।

पाठ्यपुस्तक र पाठ्यक्रम तयार पारेर पार्टीका नेता–कार्यकर्तालाई प्रशिक्षण दिँदै आएका बेदुरामलाई नै स्कुल विभाग दिनुपर्ने तर्क माधव नेपाल पक्षका नेताहरूले गर्दै आएका छन् ।

यो पनि पढ्नूहोस्

नेकपामा संकट, ईश्वरलाई झड्का !

भुसालद्वयको ‘इन्ट्री’पछि नेकपा स्कुल विभागमा ‘ट्‍विस्ट’