काठमाडौं । विश्वकप क्रिकेटको सेमिफाइनलमा बुधबार भारतको हारले सबैभन्दा खुसी पाकिस्तानलाई बनाएको छ । पाकिस्तानका एक मन्त्रीले भारतको हारमा खुसी मनाउँदै ट्विट गरेका छन् । ती हुन्– इमरान मन्त्रिमण्डलका सूचना एवम् प्रसारण मन्त्री चौधरी फवाद हुसेन । यिनका कतिपय टिप्पणी चर्चामा रहने गर्छन् । 

पहिलो सेमिफाइनलमा भारतको हारपश्चात् हुसेनले लेखे, ‘‘पाकिस्तानको नयाँ प्रेम न्युजिल्यान्ड (पाकिस्तानकी नई मोहब्बत न्युजिल्यान्ड) ।’’ न्युजिल्यान्ड त्यही देश हो, जसले भारतलाई सेमिफाइनलमा हरायो । समूह चरणको खेलमा भने यिनै दुई मुलुकले अङ्क बाँडेर लिएका थिए । वर्षाले खेल रद्द भएको थियो । 

उसो त कुनै बेला भारतले खेल हार्दा पाकिस्तान दुःखी पनि भएको थियो । तर त्यसमा उसको ठूलो स्वार्थ लुकेको थियो । समूहचरणमा इङ्ल्यान्ड र भारतको म्याच भारतले जितेको भए पाकिस्तान सेमिफाइनलमा पुग्ने सम्भावना रहन्थ्यो, यही कारण पाकिस्तानलाई भारतको जित आवश्यक थियो । तर नतिजा उल्टो आइदियो । र, पाकिस्तानी चिन्तित हुन पुगे ।   

यतिखेर पाकिस्तान खुसी हुनुको कारण भारतसँगको उसको लामो समयदेखिको खराब राजनीतिक सम्बन्ध नै प्रमुख कारण रहेको बुझ्न गाह्रो छैन । ऊ आफू त समूह चरणबाटै बाहिरिएपछि घर फर्किसकेको छ । हुसेनको ट्विट चर्चामा त छ, तर यसलाई युजर्सहरु मन पराइरहेका चाहिँ छैनन् । 

पाकिस्तान समूह चरणबाटै बाहिरिनुमा भारतको हात रहेको कतिपयले विश्लेषण नगरेका पनि होइनन् । उक्त म्याच भारतले जितिदिएको भए पाकिस्तानको सम्भावना जीवितै रहन्थ्यो । यसरी पाकिस्तानले भारतमाथि दोष लगाउनु उत्ति व्यावहारिकचाहिँ देखिँदैन । आफ्नो टोली अगाडि बढ्न आफूले नै मेहनत गर्नुपर्छ । कसैले जितिदेला वा हारिदेला र आफू सिँढी उक्लन पाएइला भनी सोच्नु उचित हुन सक्दैन । त्यसमाथि क्रिकेट खेल, जहाँ नतिजा छिनभरमै नसोचेको निस्कन सक्छ । 

भारत–न्युजिल्यान्डकै कुरा गर्दा पनि भारतले जित्ने आकलन सुरुमा गरिएको थियो । न्युजिल्यान्डले भारतलाई दिएको लक्ष्य (२४०) त्यति ठूलो पनि थिएन । खेल चल्दै गर्दा भारत केहीबेर कमजोर देखियो, तर पछि पुनः भारतको जित सम्भव देखियो । तर पनि अन्त्यतिर लगातार विकेट गुमाउँदै जाँदा भारतले १८ रनले हार बेहोर्नुपर्यो । तथापि, विश्वकप क्रिकेट २०१९ को पहिलो सेमिफाइनल दर्शकका लागि निकै रोमाञ्चक र रोचक रह्यो । 

भारत–इङ्ल्यान्डको म्याचका विषयलाई लिएर भारतमाथि आरोप लगाउन नहुने पाकिस्तानी टोलीका कप्तान सरफराजले नै बताइसकेका छन् । भारतले इङ्ल्यान्डलाई हराएकै भए पनि पाकिस्तान सेमिफाइनलमा पुग्ने निश्चित थिएन ।

सेमिफाइनलमा हारेपछि भारतमा सबैभन्दा बढी चर्चा मिडियामा चल्न थालेको छ । भारतमा विभिन्नखालका तर्क र बयानहरु सार्वजनिक हुन थालेका छन् । हारपश्चात् सबैभन्दा बढी चर्चा महेन्द्र सिंह धोनीको हुन थालेको छ । किन उनलाई सातौं नम्बरमा उतारियो ? यही प्रश्नलाई भारतीय टोलीको रणनीति भुलका रुपमा समेत हेर्न थालिएको छ । म्याच चलिरहँदा कप्तान विराट कोहली कोच रवि शास्त्रीसँग रिसाउँदै कुरा गरेको पनि देखिएको थियो ।  

(एजेन्सीहरुको सहयोगमा)