काठमाडौं । बृहत् आठौं राष्ट्रिय खेलकुद प्रतियोगिता गएको साता प्रदेश नम्बर पाँचका विभिन्न स्थानमा सम्पन्न भयो । भीआईपी प्यारापिट, खेलाडीको चटपटे मोह, पदक विजेता खेलाडीको चर्चासँगै आठौं राष्ट्रिय खेलकुदको उपराष्ट्रपति नन्दबहादुर पुनले समापन गरे । 

नवौं राष्ट्रिय खेलकुदको जिम्मेवारी गण्डकी प्रदेशले पाएसँगै आठौंबाट प्रदेश नम्बर पाँचले पाएका संरचनाको चर्चा हुन थालेको छ । त्यसो त राष्ट्रिय खेलकुद आयोजनाको उद्देश्य हरेक स्थानमा संरचनाको विकास गर्नु पनि हो । तर, अहिलेसम्म आयोजना भएका स्थानमा पूर्वाधारको अवस्था खासै राम्रो पाइँदैन । 

यसअघि विराटनगरमा सम्पन्न सातौं राष्ट्रिय खेलकुदबाट त पूर्वाञ्चल बदनाम नै भयो।  पूर्वाधार राम्रो भएन भनेर आलोचित राष्ट्रिय खेलकुद परिष्दले अन्तिम समयमा आत्तिएर आठौं खेलकुद गर्दा अहिले पनि धेरैजसो पूर्वाधार पूर्णरुपमा तयार भएनन् । नेपालगञ्ज रंगशालामा आयोजित समापन कार्यक्रममा उपराष्ट्रपति पुनले आठौंको पूर्वाधार निर्माण पूर्ण नभएकै कारण गण्डकी प्रदेशमा आयोजना हुने नवौं राष्ट्रिय खेलकुदको समयमै तयारीमा लाग्न सुझाव दिएका थिए । पूर्णरुपमा पूर्वाधार तयार नभएकै बेला खेल सञ्चालन गरेको राष्ट्रिय खेलकुद परिषद्का सदस्य सचिव केशवकुमार विष्टले भने नेपाली खेलकुदले इतिहास रचेको दाबी गरे । 

अधुरो पूर्वाधार 
आठौं राष्ट्रिय खेलकुदबाट नेपालगन्जले करोडौंको योजना तथा भौतिक पूर्वाधारहरु पाएको छ । तर अधिकांश पूर्वाधार पूर्ण रुपमा तयार भएनन् । सर्वाधिक चर्चामा रहेको भीआईपी प्यारापिट खेल समापनसम्म पनि तयार थिएन । निमार्णको जिम्मेवारी पाएको कम्पनीले अहिले पनि काम जारी नै राखेको छ । 

राखेपले जसोतसो प्रतियोगिताको उद्घाटन र समापन उक्त प्यारापिटमा गरायो । आठौं राष्ट्रिय खेलकुदको पूर्वाधार निर्माणका लागि सरकारले नेपालगञ्जमा गरेको करिब एक अर्बको लगानीको भौतिक संरचनाभित्र भीआईपी प्यारपिट पनि पर्छ । जसलाई नेपालगञ्ज रंगशाला निर्माण गर्न आठौं राष्ट्रिय खेलकुदको सबैभन्दा ठूलो योजना मानियो । जो पूर्ण रुपमा बन्न अझै केही समय लाग्ने देखिन्छ । 

पौडी पोखरीको काम पनि अधुरै छ । पौडी पोखरीमा ‘टायल’ हाल्ने काम सकिए पनि पोखरीमा पानी हालिएकै थिएन । प्रतियोगितामा पौडीतर्फका सबै खेल गराउने भनिएको भएपनि सिग्नेट होटलको पोखरीमा पौडीतर्फका १७ प्रतिस्पर्धा भए । 

नेपालगन्जले आठौंसम्म पाएको अर्काे अधुरो पूर्वाधार भनेको रंगशालाको दुबो हो । रंगशालामा करिब ४० लाख रुपैयाँबराबरको दुबो हाल सुक्ने अवस्थामा छ । उद्घाटनको समयमा आकर्षणको केन्द्र बनेको हरियाली मैदान समापनको समयमा अधिकांश स्थानमा सुकेको थियो । 

इन्डोरमा गर्ने खेल आउटडोरमा 
राखेपले आठौं खेलकुद सञ्चालन गर्नुपूर्व इनडोरमा हुने सबै खेलहरु इनडोरमा नै हुने बाचा गरेको थियो । तर, कतिपय खेल विद्यालयको मैदानमा भए । आईटिएफ तेक्वान्दो र फुल कन्ट्याक्ट कराते महेन्द्र क्याम्पस नेपालगन्जमा भयो । दुवै प्रतियोगिता क्याम्पसको मैदानमा पाल टाँगेर गरिएको थियो । दुवै प्रतियोगिता खेलाडीहरुले २५ डिग्री तापक्रममा खेलेका थिए । जुडो र जिम्न्याष्टिक पनि २५ डिग्रीमाथिको तापक्रममा गरिएको थियो । 

बक्सिङ पनि नेपालगन्जको ज्ञानोदय माविमा सम्मन्न भएको थियो । आठौंका लागि दर्शक खचाखच भरिएको अर्काे इनडोर खेल भनेको भलिबल हो । नेपालको राष्ट्रिय खेल भलिबल पनि भलिबल एकेडेमी खजुरामा सम्पन्न भयो । एकै समयमा दुई स्थानमा भलिबलका प्रतियोगिता भए । यसले गर्दा भलिबल हर्न आउने दर्शक पनि अन्योलमा परेका थिए । यस्तै, महिला फुटबल दाङमा गराइयो । खाल्डाखुल्डी भएको रंगशालामा खेल्दा चोटपटक लागेको खेलाडीले गुनासो गरेका छन् । 

नयाँ इतिहास 
२०३८ सालबाट सुरु भएको राष्ट्रिय खेलकुद नियमित भएको थिएन । यतिबेला २० औं संस्करणको प्रतियोगिता हुनुपर्नेमा राष्ट्रिय खेलमा जम्मा आठौं संस्करणको प्रतियोगिता सम्पन्न भयो । यो संस्करणमा पनि केही आलटाल नभएको होइन । समय–समयमा मिति सर्दै आठौं खेलकुद दुई वर्षभित्र नै समापन भयो । समापनको समयमा राखेपका सदस्य सचिव केशव कुमार विष्ठले यो एक ऐतिहासिक क्षण रहेको पनि बताए । लामो समयसम्म समयमा हुन नसकेको प्रतियोगिता समयमै सम्पन्न गर्दै सदस्य सचिव विष्टले खेल क्षेत्रमा राम्रै प्रशंसा कमाएका छन् ।