नेपालगन्ज । नेपालगन्जको शीरैमा पर्ने कोहलपुर । हिउँदमा अत्यधिक जाडो र बर्खामा अत्यधिक गर्मी हुने ठाउँ ।  कोहलपुरको चौराह धेरै मान्छेको ध्यान खिच्न सफल ठाउँ हो । जसलाई कोहलपुरको पहिचान पनि भनिन्छ । पछिल्लो समय कोहलपुरले आफ्नो पहिचान क्रिकेटसँग जोड्न थालेको छ । त्यसको उदाहरणका रुपमा आठौँ राष्ट्रिय खेलकुद प्रतियोगिता अन्तर्गत पुरुषतर्फको क्रिकेट कोहलपुरको प्रस्तावित अन्तर्राष्ट्रिय क्रिकेट मैदानमा भैइरहेको छ । त्यसको मुख्य श्रेय जान्छ, नेपाली राष्ट्रिय क्रिकेट टोलीका पूर्वकप्तान एलबी क्षेत्रीलाई । उनकै प्रयासले यो रंगशालामा राष्ट्रिय प्रतियोगिता भइरहेको छ । 

त्यसो त धेरै खेलाडीलाई आफ्नो खेल जीवनबाट सन्यास लिएर भविष्यमा प्रशिक्षक या कुनै एकेडेमी सञ्चालन गरेको देख्न सकिन्छ । तर, पूर्वकप्तान क्षेत्री फरक छन् । निकै लामो समय राष्ट्रिय टोलीलाई प्रतिनिधित्व गरेका उनी हाल क्रिकेटर बन्ने सपना लिएर गन्तव्यको खोजीमा रहेका भविष्यका सयौं क्रिकेटरहरुको प्रतिनिधित्व गर्ने प्रयासमा जुटिरहेका छन् ।
यसअघि पनि उनले घेरै अनुहारहरुलाई भविष्य नदेखाएका होइनन् । १५ वर्षअघि नै क्षेत्रीले कोहलपुर मैदानमा नेपालमै पहिलो महिला क्रिकेट प्रतियोगिता सञ्चालन गरेका थिए ।

अहिले यो रंगशालामा राष्ट्रिय खेलकुद प्रतियोगिता अन्तर्गत पुरुष क्रिकेट चलिरहेको छ । लामो समयसम्मको प्रयासले नै रंगशालाले राष्ट्रिय क्रिकेटरलाई मैदानमा पाएको हो । 
“सुरुवाती चरणमा निकै ठूलो अपेक्षा पनि लिएको थिइन । यसलाई एउटा राम्रो क्रिकेट मैदानको रुपमा देख्ने चाहना थियो । तर, सबैको साथ र सहयोगले अन्तर्राष्ट्रिय क्रिकेट मैदानसम्म पुर्याउने प्रयास सफल भयो,” क्षेत्री भन्छन् । कोहलपुर क्रिकेट मैदानमा आठौं राष्ट्रिय खेलकुद प्रतियोगिता अन्तर्गत पुरुष क्रिकेटका समूह ‘बी’का खेलहरु चलिरहेका छन् भने सेमिफाइनल तथा फाइनल खेलहरु पनि कोहलपुरमा हुनेछन् । 

“लामो समयसम्म राष्ट्रिय टोलीमा बिताएँ, देशका लागि केहि दिएँ जस्तो पनि लागेको छ, देशले पनि मलाई बेग्लै पहिचान दिएको छ । अझै पनि देशलाई केही दिने चाहना छ । नेपाली क्रिकेटलाई एउटा रंगशाला निर्माणमा सहयोग गर्दैछु,” उनले भने ।

क्षेत्री नेपाली महिला क्रिकेटको जग बसाउने व्यक्ति समेत हुन् । २०६० सालमा प्रतियोगिता गर्दै पहिलो राष्ट्रिय महिला क्रिकेट टोली छान्ने आधार तय गर्ने श्रेय उनलाई नै जान्छ । त्यसपछि २०६४ सालमा रुपन्देही र बाँकेका महिला टोलीबीच तीनवटा मैत्रीपूर्ण खेल सम्पन्न भएको थियो । उक्त प्रतियोगिताबाट छानिएको टोलीले सन् २००७ मा नेपाली महिला क्रिकेटको पहिलो अन्तर्राष्ट्रिय क्रिकेट प्रतियोगिता खेलेको थियो । 

“जीवनमा केहि सफलताहरु हात पारियो । कोहलपुर रंगशालालाई अन्तर्राष्ट्रिय क्रिकेट रंगशाला बनाउन सकिएमा जीवनको ठूलो सफलता हुनेछ,” क्षेत्रीले भने । सरकार र राष्ट्रिय खेलकुद परिषद् पनि यसमा सकारात्मक देखिएकाले काम समयमै सम्पन्न हुने उनको विश्वास छ ।