दाङ । दाङमा व्यावसायिक रुपमा ड्रागन फ्रुट खेती गर्न थालिएको छ । लमही नगरपालिका वडा नं १ कौडिया निवासी वसन्तकुमार शर्माले काठमाडौंमा रहेको बहुआयामिक कृषि उत्पादन तथा वितरण प्रालिको शाखा विस्तारको रुपमा दाङमा  व्यावसायिक खेती  शुरु गरेका हुन् ।

दाङमा अन्य व्यक्तिले व्यावसायिक रुपमा ड्रागन फ्रुटको खेती गरेका छैनन् । केही व्यक्तिले केही बिरुवा लगाएपनि व्यावसायिक रुपमा भने खेती कसैको छैन । शर्माले विगत २ वर्षदेखि व्यावसायिक रुपमा ड्रागन खेती सुरु गरेका हुन् । उनले अहिले ६ कट्टा जग्गामा १ हजार वटा बिरुवा रोपेर खेती गरेका छन् ।

६ कट्टाबाट बढाएर १ विगाहामा पुर्याउने उनको लक्ष्य छ । १ विगाहामा ३ हजार बिरुवा रोप्ने उनको लक्ष्य रहेको छ । “अन्य बालीभन्दा ड्रागन फ्रुटबाट फाइदा हुने भएकाले विस्तार गर्ने थालेको हुँ,” शर्माले भने । सुरुमा उनले काठमाडौंबाट ३ वटा बिरुवा ल्याएर रोपेका थिए । उक्त बिरुवा राम्रो भएपछि व्यावसायिक रुपमा नै अगाडि बढाएको उनी बताउँछन् । ड्रागन फ्रुट खेती गर्नका लागि दाङ उपयुक्त स्थान रहेको उनले बताए ।

ड्रागन फ्रुट फलफूलको रुपमा प्रयोग गरिने शर्माले बताए । एउटा बिरुवाबाट एक वर्षमा ३५ किलोसम्म फल दिने शर्माको भनाइ रहेको छ । आफूले लगाएको बिरुवाले उचित स्याहार सुसार पाएकाले १७ महिनामै फलेको उनले बताए । १७ महिनामै फलेको हुनाले प्रति बिरुवाबाट आफूले ५ किलो उत्पादन लिन सफल भएको शर्माले बताए ।

उत्पादन गरिएको ड्रागन फ्रुट जिल्लाका बजारहरु लमही, घोराही, तुलसीपुर, भालुवाङ, सल्यान, प्युठान, अन्य जिल्लाहरुसंँगै लखनउसम्म पुर्याएको शर्माले बताए ।