एजेन्सी । नोभाक जोकोभिचले आइतबार मेलबर्नमा राफेल नाडाललाई हराउँदै कीर्तिमानी सातौं पटक अस्ट्रेलियन ओपनको उपाधि जितेका छन् । जोकोभिचको यो लगातार तेस्रो ग्रान्डस्लाम उपाधि हो । 

शीर्ष वरियाता प्राप्त सर्वियाका जोकोभिचले नाडाललाई ३–० को सोझो सेटमा पराजित गरेको हुन् । जोकोभिचले ६–३, ६–२, ६–३ को सेटमा नतिजा निकाल्दै कीर्तिमानी सातौं पटक उपाधि जितेका हुन् ।  

“म मेरो परिवारलाई सम्झन चाहन्छु । मेरो श्रीमती, छोरा र छोरीले अहिले मलाई हेरिरहेका होलान् । यो उपाधि मेरा लागि अझ विशेष छ । मेरो सबैभन्दा नजिक रहने परिवारसँग यो उपाधि बाड्न चाहन्छु । उनीहरुको अपार माया र सहयोगका लागि आभारी छु,” उपाधि जितेपछि जोकोभिचले भने, “पछिल्लो १२ महिना मेरा लागि सहज थिएन । ठीक १२ महिना अघि मैले शल्यक्रिया गरेको थिएँ । यो बीचमा मैले चारमध्ये तीन ग्रान्डस्लामको उपाधि जित्न सफल भए । यो आफैमा अदभुत छ । यतिबेला मसँग व्यक्त गर्ने शब्द छैन ।”

नाडाललाई हराउन २ घन्टा ४ मिनेट समय लगाएका जोकोभचिले रोए इमर्सन र रोजर फेडेररर्ला पछि पार्दे अस्ट्रेलियन ओपनमा सातौं उपाधि जितेका हुन् । फेडेरर र इमर्सनले समान ६ पटक अस्ट्रेलियन ओपनको उपाधि जितेका छन् । 

“मलाई विश्वास छ मैले राम्रो टेनिस खेले । यो म अफैका लागि प्रेरणादायी हुनेछ । मलाई सहयोग गर्ने सबैलाई धन्यवाद,” स्पेनका नाडालले भने, “म अझै कडा मिहिनेत गर्छु । र अझै राम्रो खेलाडी बन्न संघर्ष गर्नेछु । अहिले म यतिमात्र भन्न सक्छु । लामो समय देखी म हरेक क्षण संघर्ष गर्दै आइरहेको छु । घाइते भएको अवस्थामा मेरा लागि त्यो अझै कठिन बनिदिन्छ । पछिल्लो दुई वर्ष मेरा लागि धेरै कठिन रह्यो । आजको रात मेरो हुन सकेन । तर चोटमुक्त भएर फर्किएको मेरा लागि यो विशेष रह्यो ।”

अस्ट्रेलियन ओपनमा महिलातर्फको उपाधि जितेकी नाओमी ओसाकाले जितेकी थिइन् । जापानकी ओसाकाले चेक गणतन्त्रकी पेत्रा केभितोभालाई ७–६(७÷२), ५–७, ६–४ को सेटमा हराएकी हुन् । जितसँगै ओसाका वरियाताको शीर्ष स्थानमा उक्लिएकी छिन् । यसअघि उनी चौथो वरियातामा थिइन् ।