काठमाडौं । सुरुवाती तथ्यांकहरुका अनुसार सन् २०१६ अहिलेसम्मकै सर्वाधिक तातो वर्ष सावित हुने संकेत मिलेको बीबीसीले जनाएको छ ।

सुरुवाती नौ महिनाको तथ्यांक विचार गर्दै वैज्ञानिकहरुले सन् २०१६ ले २०१५ लाई जित्ने ९० प्रतिशत सुनिश्चित भएको बताएका छन् ।

यो रिपोर्ट जलवायु परिवर्तनसम्बन्धी पेरिस सम्झौताको कार्यान्वयनको बारेमा मोरक्कोमा भइरहेको बैठकका क्रममा सार्वजनिक गरिएको हो ।

विश्व मौसम विज्ञान संगठन (डब्ल्यूएमओ) का अनुसार जनवरी देखि सेप्टेम्बरबीचको तापक्रम औद्योगिकीकरण पहिलेको स्तर भन्दा १.२ डिग्री सेल्सियस बढेको पाइएको छ ।

विश्व मौसम विज्ञान संगठनका अनुसार यो वर्षका बाँकी दिनको तापक्रम पनि बढी हुने र सन् २०१५ को किर्तीमान तोडिनेछ । 

तापक्रम बृद्धि हुनुमा एल नीनो र कार्बन उत्सर्जन जिम्मेबार भएको बताइएको छ ।

विश्व मौसम विज्ञान संगठनका महासचिव पेटरी तलास भने, “अर्को वर्ष, अर्को किर्तीमान । सन् २०१५ मा जुन उच्च तापक्रम हामीले भोग्यौं । त्यसलाई २०१६ ले माथ दिनेछ ।” “जलबायु परिबर्तनका कारण भयाबह अवस्था उत्पन्न भएको छ । लु चल्नु तथा बाढी आउनु नियमित घटना जस्तो भइरहेको छ । 

समुन्द्रको पानीको स्तर बढ्नाले ट्रपिकल चक्रवात सिर्जना गर्ने अवस्था उत्पन्न भएको छ,” उनले भने ।