राजनीति
काठमाडौं । अख्तियार दुरुपयोग अनुसन्धान आयोगका प्रमुख आयुक्त लोकमान सिंह कार्कीलाई महाभियोग लगाउनुपर्ने भन्दै व्यवस्थापिका–संसदमा दर्ता भएको महाभियोग प्रस्ताव अघि बढेको छ ।
आइतबार छोटो समय बसेको संसद्को बैठकमा सभामुख ओनसरी घर्तीले महाभियोग प्रस्तावमाथिको छलफलको मिति र समय तोक्दै प्रक्रिया अघि बढाएकी हुन् ।
त्यसबीचमा कांग्रेसले पनि निर्णय गरिसक्ने उनको विश्वास छ । आइतबारको बैठकमा सभामुख घर्तीले मंगलबार ३ बजे प्रस्तावमाथि छलफल हुने जानकारी दिएकी हुन् ।
बुधबार नेकपा एमाले र माओवादी केन्द्रका १५७ सांसदले अख्तियार दुरुपयोग अनुसन्धान आयोगका प्रमुख आयुक्त लोकमान सिंह कार्कीविरुद्ध महाभियोग प्रस्ताव दर्ता गराएका थिए । बिहीबार नै छलफलको मिति र समय तय गर्ने तयारी भए पनि प्रधानमन्त्रीको आग्रहमा बैठक स्थगित गरिएको थियो ।
बैठकपछि पत्रकारहरुसँग कुरा गर्दै सभामुख घर्तीले महाभियोग प्रस्तावमा अब विलम्व नहुने धारणा राखिन् । “महाभियोग प्रस्तावमा अब विलम्व हुँदैन,” उनले संवाददाताहरुसँग भनिन्, “यो प्रस्तावमा चलखेल हुन्छ कि भन्ने आशंका व्याप्त छ । तर यसमा चलखेल हुँदैन ।” उनले यसअघि दलहरुकै आग्रहबमोजिम संसद्को बैठक स्थगित भएको जानकारी गराइन् ।
“कांग्रेसमा अझै पनि निर्णय गर्न बाँकी रहेको जानकारीमा आयो,” उनले भनिन्, “९ गते नै संसद्को बैठकमा प्रस्ताव टेवल हुन्छ । त्यसपछि प्रस्तावमाथि छलफल हुन्छ ।”
यसैबीच महाभियोग प्रस्तावका प्रस्तावक महेन्द्रबहादुर शाहीले महाभियोग प्रस्ताव अब कसैले रोकेर नरोकिने धारणा राखे । सिंहदरबारमा आइतबार पत्रकारहरुसँग कुरा गर्दै उनले प्रस्ताव टेवल गर्ने बेला ९ गतेसम्म आफूलाई कसैले मार्न नसके प्रस्ताव टेवल हुने बताए । उनले पार्टीभित्र र बाहिरबाट पनि विभिन्न खालका दवाव आएको जानकारी दिए ।
प्रकाशित मिति: आइतबार, कात्तिक ७, २०७३ १७:२७
प्रतिक्रिया दिनुहोस्