काठमाडौं । प्रमुख प्रतिपक्षी दल नेपाली कांग्रेसले कानुन, न्याय तथा संसदीय मामिला मन्त्री शेरबहादुर तामाङलाई पदबाट बर्खास्त गर्न माग गरेको छ । प्रतिनिधिसभाका सचेतक पुष्पा भुषाल गौतम र राष्ट्रिय सभाका प्रमुख सचेतक सरिता प्रसाईंले सोमबार संयुक्त रुपमा विज्ञप्ति जारी गरेर मन्त्री तामाङलाई बर्खास्त गर्न सरकारसँग माग गरेका हुन् । 

बंगलादेशमा चिकित्सा शिक्षा अध्ययन गरिरहेका र अध्ययन गरी फर्केका छात्राहरुको अस्मितामा आँच आउने गरी कानुनमन्त्री तामाङले दिएको अशोभनीय अभिव्यक्तिलाई कांग्रेसले गम्भीरतापूर्वक लिएको विज्ञप्तिमा उल्लेख छ । उनको अभिव्यक्तिले बंगलादेशसँगको नेपालको निकटतम सम्बन्धमाा समेत प्रतिकूल प्रभाव पर्ने कांग्रेसको ठहर छ ।   

मन्त्री तामाङले काठमाडौंको एक शैक्षिक संस्थाको कार्यक्रममा बंगलादेशमा अध्ययनरत नेपाली चेलीहरुले आफ्नो शरीर बेचेर एमबीबीएसको प्रमाणपत्र लिने गरेको बताएका थिए । यसअघि झापास्थित बि एण्ड सी मेडिकल कलेजका सञ्चालक दुर्गा प्रसाईंले पनि बंगलादेशमा अध्ययन गर्न जाने नेपाली चेलीहरुलाई प्राध्यापकहरुले करणी गरेर लामो समय राख्ने गरेको बताएका थिए ।