काठमाडौं । बुधबार सार्वजनिक भएको मौद्रिक नीतिमाथि बैंकर तथा व्यवसायीहरुले मिश्रित प्रतिक्रिया दिएका छन् । नेपाल राष्ट्र बैंकका गभर्नर डा. चिरञ्जीवी नेपालले प्रस्तुत गरेको मौद्रिक नीतिमाथि प्रतिक्रिया जनाउँदै बैंकर व्यवसायी तथा निजी क्षेत्रले यसलाई ‘मिक्स्ड ब्याग’ भएको प्रतिक्रिया दिएका हुन् ।

यसका नकारात्मकभन्दा सकारात्मक पक्ष धेरै भएको भन्दै ती पक्षलाई बिर्सन नहुने उनीहरुको धारणा छ । प्रस्तुत छ बुधबार सार्वजनिक गरिएको मौद्रिक नीतिमा व्यवसायीको प्रतिक्रिया 

ज्ञानेन्द्र ढुंगाना, अध्यक्ष, नेपाल बैंकर्स संघ

हामीले चाहेअनुसारको मौद्रिक नीति आएको छ । बजेटले लिएको ८ प्रतिशतको आर्थिक वृद्धिदर हासिल गर्न यो नीति सफल हुन्छ । लगानी योग्य रकम तरलताको जुन समस्या थियो, त्यो समाधानमा भोलिका दिनमा ब्याजदरको स्थायित्व यो मौद्रिक नीतिले आत्मसात् गर्न सक्छ । यसमा राष्ट्र बैंकले विशेष ध्यान दिएको छ ।

हामीले सीसीडी हटाउन माग गरेका थियौं । तर, राष्ट्र बैंकले सीसीडीलाई सहयोग गर्नेगरी डिबेन्चरलाई सीसीडीमा गणना गर्न पाउने व्यवस्था भयो । सीआरआर घट्यो, एसएलआर घट्यो, ग्रामीण क्षेत्रका शाखाको सीआरआर गणना गर्नु नपर्ने व्यवस्था भयो । पुनकर्जाको सीमा बढेर ३५ अर्ब पुर्याइयो ।

विदेशबाट पैसा ल्याउँदा हेजिङको व्यवस्था भयो । भारुमा ऋण ल्याउन पाइने भयो । यी व्यवस्थाले बैंकिङ प्रणालीमा देखिएको लगानी योग्य पुँजीको अभावको समस्या अब अन्त्य हुने देखिन्छ । मौद्रिक नीतिका नकरात्मक पक्ष केही छैनन् । सबै सकरात्मक छन् ।

शेखर गोल्छा, वरिष्ठ उपाध्यक्ष, नेपाल उद्योग वाणिज्य महासंघ

हाम्रा धेरै सुझाव समावेश गरेर मौद्रिक नीति ल्याइएको छ । हामीले ठूलो समस्याको रुपमा रहेको व्याजदर कम हुनुपर्छ भनेका थियौ । सिआरआर रेसियोमा पनि केही कम गरिएको छ । यसले केही मात्रामा भएपनि तरलता बजारमा सकारात्मक प्रभाव पार्ने अपेक्षा छ । पुनकर्जाको लागि पनि मौद्रिक नीतिले सम्बोधन गरेको छ ।

यता सोधान्तर घाटामा भएको वृद्धी हाम्रो लागि ठूलो चुनौति हो ।  महंगी नियन्त्रण गर्ने भनेर बजेटमा पनि भनिएको थियो । मौद्रिक नीतिमा पनि भनिएको छ । तर यो रोक्न भने गाह्रो देखिन्छ । करको दर बढाएको, न्यूनतम तलब पनि बढाएको अवस्थामा इन्फ्लेसनलाई नियन्त्रण गर्ने कुनै पनि मापदण्ड यहाँ देखिएको छैन् ।

हाम्रो आन्तरिक र बाह्य ऋण पनि निकै सन्तुलनमा रहेको छ । यस्तो अवस्थामा मौद्रिक नीति तथा बजेटमा लिईएका लक्ष्य पनि यथार्थपरक छन् । हामी एकदमै उत्साहि छौं । त, पनर्कर्जा लगायत विविध विषयका विस्तृत विवरण आउन बाँकी छन् । त्यो सबै आएपछि थाह हुन्छ ।

कमलेशकुमार अग्रवाल, नेपाल चेम्बर्स अफ कमर्स
 

मौद्रिक नीति विस्तारित तथा सन्तुलित छ । यसका सकारात्मक र नकारात्मक दुवै पक्ष रहेकाले यसको कार्यान्वयनमा ध्यान दिनुपर्ने देखिन्छ । यसका लागि विस्तारित मौद्रिक नीति ल्याउनुपर्छ ।”  “फण्ड फ्लो” गर्ने अर्थात् मौद्रिक उपकरण नगद सुरक्षण अनुपात (सिआरआर), वैधानिक तरलता अनुपात (एसएलआर) तथा नगद निक्षेप अनुपात (सिडी) लाई खुकुलो गर्नुपर्छ ।

प्रकाशराज शर्मा, वरिष्ठ उपाध्यक्ष, लघुवित्त बैंकर्स संघ
 

आगामी आर्थिक वर्षको मौद्रिक नीतिबाट लघुवित्त क्षेत्रले धेरै अपेक्षा राखेको भए पनि त्यसको सम्बोधन भएको छैन । लघुवित्त वित्तीय संस्थाहरुलाई श्रोत व्यवस्थापनको ठूलो समस्या भएपछि मौद्रिक नीतिले सम्बोधन गर्न सकेको छैन । 
मौद्रिक नीतिले ब्याजदर लगायतका विषयमा भने राम्रो सम्बोधन गरेको छ ।

अनिल केसरी शाह, प्रमुख कार्यकारी अधिकृत, नबिल बैंक
 

बजेटलाई सम्बोधन गर्नेगरी मिश्रित मौद्रिक नीति आएको छ । ग्रामीण क्षेत्रका बैंक शाखामा वैधानिक तरलता अनुपात (एसएलआर) र नगद मौज्दात अनुपात (सिआरआर) नलाग्ने मैद्रिक नीतिमा उल्लेख हुनु सकारात्मक विषय हो । मौद्रिक नीतिका व्यवस्थाले व्याजदरको समस्या समाधान हुँदै जाने पक्का छ । सिआरआर घटाइँदा बैंकहरुमा केही लगानीयोग्य रकम पनि जुट्ने छ ।

सेयर कर्जाका साथै मार्जिन कलका सम्बन्धमा नीतिले गरेको व्यवस्थाबाट सेयर बजारका लगानीकर्ता उत्साहित बन्नु पर्ने देखिन्छ । वाणिज्य बैंकलाई सेयर दलाल व्यवसाय संचालनको बाटो खुल्ला भएकाले सेयर बजार अब रिङरोड भित्र मात्र सीमित हुँदैन ।

राजनसिंह भण्डारी, प्रमुख कार्यकारी अधिकृत, सिटिजन्स बैंक इन्टरनेसनल

समग्रमा मौद्रिक नीति सकारात्मक छ । संस्थागत निक्षेप दुरुपयोग हुन नदिनेतर्फ सम्बद्ध पक्ष सधैंँ सचेत रहनुपर्छ ।

कृष्णराज लामिछाने, प्रमुख कार्यकारी अधिकृत, महालक्ष्मी विकास बैंक 

मौद्रिक नीतिले अर्थतन्त्रलाई चलायमान बनाउने पकका छ । यसले विद्यमान वित्तीय समस्यालाई सम्बोधन गरेको छ ।

शोभनदेव पन्त,प्रमुख कार्यकारी अधिकृत, बैंक अफ काठमाडौं
 

बजारमा तरलता अभाव अन्त्य गर्ने लक्ष्यका साथ प्रस्तुत मौद्रिक नीतिले अर्थतन्त्रलाई सकारात्मक दिशातर्फ उन्मुख गराउने मेरो विश्वास छ ।