![वुद्ध एयरले दियो नेपालगञ्ज–नयाँ दिल्ली उडानको आवेदन, ६ महिनाभित्रै उडान हुने](https://12khari.de/uploads/posts/1918201850Capture.jpeg)
काठमाडौं । वुद्ध एअरले नेपालगञ्ज–नयाँ दिल्ली उडानका लागि निवेदन दर्ता गराएको छ । कम्पनीले नेपालगञ्ज विमानस्थलबाट भारतको नयाँदिल्लीस्थित इन्दिरा गान्धी अन्तर्राष्ट्रिय विमानस्थलसम्मको उडान सञ्चालनका लागि संस्कृति, पर्यटन तथा नागरिक उड्डयन मन्त्री रविन्द्र अधिकारीसमक्ष निवेदन बुझाएको हो ।
पत्रमा वुद्ध एयरले एटीआर ७२ विमानद्वारा दैनिक तीन उडान गर्ने जनाएको छ । ती उडान बिहान साढे ६ बजे, दिउँसो १ बजे र साँझ ५ः१० बजे हुने छ । मन्त्रालयबाट अनुमति पाएलगत्तै भारतीय विमानपत्तन प्राधिकरणसमक्ष पनि निवेदनका लागि तुरुन्तै प्रक्रिया थाल्ने वुद्ध एयरले जनाएको छ ।
यता वुद्ध एयरका पदाधीकारीहरुसँगको भेटमा मन्त्री अधिकारीले कम्पनीको यस घोषणाबाट आफू निकै सकारात्मक रहेको बताए । त्यसै अनुरुप नेपालगञ्ज विमानस्थललाई क्षेत्रीय अन्तर्राष्ट्रिय घोषणालगायत आवश्यक पूर्वाधारहरु इमिग्रेसन, कस्टम ६ महिनाभित्र सकिने विश्वास दिलाए ।
नेपाल नागरिक उड्ययन प्राधिकरण र भारतीय विमानपत्तन प्राधिकरणवीच हालै सम्पन्न उडान सहमतिले हवाईमार्ग एल६२६ लाई दुईतर्फि रुटको रुपमा स्थापित गरेको छ । यस सहमतिले टर्बोप्रप एटीआर विमानहरुबाट नेपालगञ्जदेखि भारतको केन्द्रीय राजधानी नयाँदिल्लीको हवाई उडान करिब १ घण्टा १० मिनेटमा भर्न सकिन्छ ।
![Global Ime bank](https://baahrakhari.com/uploads/bigyaapan/30885600.gif)
नेपालगञ्जबाट सिधा नयाँदिल्ली हवाई उडान सञ्चालनमा आउँदा मध्यपश्चिम एवं सुदुरपश्चिमको आर्थिक समृद्धिमा कोशेढुंगा सावित हुने विश्वास वुद्ध एयरले लिएको छ । यो हवाईमार्ग सञ्चालनमा आउन सके यसले नेपालको मध्यपश्चिम र सुदुरपश्चिममा बसोबास गर्ने नेपालीहरुलाई नेपालगञ्जमार्फत सिधै नयाँदिल्लीसँग जोड्ने कम्पनीको दावी छ । साथै यस उडानले प्रचुर सम्भावना रहेर पनि ओझेलमा परेका पर्यटन उद्योग एवं त्यस क्षेत्रको व्यापार व्यवसायको पनि प्रवद्र्धन हुने विश्वास कम्पनीको छ ।
नेपालगञ्ज–नयाँदिल्ली–नेपालगञ्ज अन्तर–सिमा उडानसँगै कम्पनीले दैनिक नेपालगञ्ज–पोखरा–नेपालगञ्जको पनि उडान सञ्चालनको तयारी गर्ने जनाएको छ । अन्तर्राष्ट्रिय उडानतर्फ बुध्द एयर अहिले एटीआर जहाजबाट भारतको वाराणसी उडान भर्दै आएको छ ।