काठमाडौं । गृह मन्त्रालयले बनाएको विशेष छानबिन टोलीले साढे ३३ किलो सुनका मुख्य लगानीकर्ता भनिएका एमके अग्रवालको काठमाडौंस्थित घरमा छापा मारेको छ ।
अनुसन्धान टोलीले शुक्रबार दिनभर अग्रवालको घरमा छापा मारेको थियो । उनको घरमा छापा मार्दा १६ तोला सुन, सुन बोक्न प्रयोग गरिने ज्याजेट, ३० लाख रुपैयाँ नगद र ४ किलो चाँदी फेला परेको समिति स्रोतले जानकारी दिएको छ ।
समिति स्रोतका अनुसार उनको घरमा छापा मारेर केही कागजात बरामद गरिएको छ ।
माघको ९ गते अवैध रुपमा ल्याइएको साढे ३३ किलो सुनका मुख्य लगानीकर्ता भन्दै अग्रवाललाई समितिले खोजबिन जारी राखेको छ । अग्रवाल भारतमा लुकेर बसेको आशंका गरिएको भए पनि उनी पत्ता भने लागेको छैन ।
यसअघि पक्राउ परेको सबैजसाले उक्त सुनमा अग्रवालले लगानी गरेको बयान दिएका थिए । उनी अहिले समितिको सर्वाधिक खोजीमा रहेका व्यक्ति हुन् । उनको घरमा छापा मारेपछि अनुसन्धानका लागि सहयोग पुग्ने केही कागजात फेला परेको स्रोतले जनाएको छ ।