काठमाडौं । प्रमुख प्रतिपक्षी दल नेपाली कांग्रेस सभापति शेरबहादुर देउवाले सरकारको नीति तथा कार्यक्रममा नीतिहरु मात्रै रहेको र कार्यक्रम नभएको टिप्पणी गरेका छन् । प्रतिनिधिसभा बैठकमा बुधबार सरकारको आर्थिक वर्ष २०७५/०७६ को नीति तथा कार्यक्रममाथिको सैद्धान्तिक छलफलमा भाग लिँदै उनले नीति तथा कार्यक्रममा लक्ष्य छन् तर स्पष्ट रुपमा लेखिएका कार्यक्रम नरहेको बताए ।
सभापति देउवाले भने, “योजना र कार्यक्रम बिनाका सपना केवल मनोकामना मात्र हुन् । सरकारलाई कर्मकाण्डी बन्ने छुट छैन । आफूलाई बलियो मान्ने सरकारले आर्थिक र सामाजिक सुधारका लागि ठुल्ठूला जोखिम मोल्नुपर्छ, त्यो स्पीरिट म देख्दिँन ।”
विसं २०४६ सालको राजनीतिक परिवर्तनपछि बनेको कांग्रेसको सरकारले आर्थिक क्षेत्रमा साहसिक र दूरगामी असर पार्ने क्रान्तिकारी काम गरेको उल्लेख गर्दै उनले तत्कालीन सरकारले नै अर्थतन्त्रमा विभिन्न संरचनाको सुधार गरी उदारवाद अर्थतन्त्रको जग बसालेको जानकारी गराए ।
उनले कांग्रेसका पूर्वसभापति एवं पूर्वप्रधानमन्त्री सुशील कोइरालाको नेतृत्वमा नै नयाँ संविधान जारी भएको र त्यसलाई सर्वस्विकार्य बनाउन आफूहरुले संविधान संशोधनको प्रयास गरेको बताए ।
उनले भने, “स्थानीय, प्रदेश र संघका ऐतिहासिक चुनाव सफल रुपमा सम्पन्न गराई मैले नेपालको नयाँ संविधानलाई सफल कार्यान्वयनमा लगेर छोडेको छु । अब देशले स्थिरता र समुन्नतिको बाटो समातेको छ । राजनीतिक संक्रमण सकिएको छ । विगत दुई वर्षलगातार उच्च आर्थिक वृद्धि दर हासिल गरिएको छ । अहिलेको सरकारलाई अवसर थियो । तर सरकारले प्रस्तुत गरेको नीति तथा कार्यक्रममा कुनै सिर्जनशीलता देखिएन ।”
अहिलेको आवश्यकता भनेको संघीयतालाई सफल रुपमा कार्यान्वयन गरी सिंहदरबारको अधिकार गाउँगाउँमा पुर्याई जनतालाई सशक्त र सम्पन्न गराउनु हो भन्दै सभापति देउवाले नीति तथा कार्यक्रममा संघीयताको कानुनी तथा प्रशासनिक संरचनालाई क्रियाशील गराउने कुरामा स्पष्ट धारणा नआएको टिप्पणी गरे ।
प्रदेश र स्थानीय तहलाई निष्प्रभावी बनाउने घुमाउरो नियत कांग्रेसलाई स्वीकार्य नहुने भन्दै उनले नीति तथा कार्यक्रमले ग्रहण गरेको यो मर्मले राजनीतिक आन्दोलनका उपलब्धिलाई नजरअन्दाज गर्न खोजिएको भान भएको उल्लेख गरे ।
दिशाहीन, छरपस्ट सिद्धान्त र नीतिको पोकोले वर्तमान अवस्थामा देशले चाहेको बृहत् लगानी र व्यापक रुपमा रोजगारीका अवसर सिर्जना गर्ने कुरा दिवा सपना मात्रै हुने धारणा व्यक्त गर्दै सभापति देउवाले सरकारले तोकेका लक्ष्य पूरा हुने विश्वसनीय आधार छैनन् भने ।
उत्तर–दक्षिण, पूर्व र पश्चिमका हाम्रा सीमानाको सुरक्षा गरेर बसेका नेपाली दाजु–भाई दिदीबहिनीलाई राष्ट्रवादबारे पाठ पढाउन जरुरी नभएको टिप्पणी गर्दै उनले नेपाली जनता जहाँ बसेका भएपनि सबै राष्ट्रवादी हुन् भने । रासस
