काठमाडौं । अघिल्लो महिनाको तुलनामा नेपालको मूल्यवृद्धि घटेको देखिएको छ । नेपाल राष्ट्र बैंकले सार्वजनिक गरेको चालू आवको पहिलो ९ महिनाको वित्तीय विवरणले अघिल्लो महिनाको तुलनामा वार्षिक विन्दुगत आधारमा मूल्यवृद्धि दर घटेको देखिएको हो ।
राष्ट्र बैंकका अनुसार वार्षिक विन्दुगत आधारमा चैत मसान्तसम्मको नेपालको वार्षिक मुद्राफ्रिति ५.३ प्रतिशत रहेको छ । अघिल्लो महिना यो तथ्यांक ६ प्रतिशत रहेको थियो । यद्यपि अघिल्लो वर्षको सोही अवधिको तुलनामा भने मूल्यवृद्धिदर बढी हो । अघिल्लो वर्ष नेपालको मुद्राफ्रिति ३.८ प्रतिशतमात्र रहेको थियो ।
खाद्य मुद्रास्फीतिमा आएको वृद्धिका कारण समीक्षा अवधिमा समग्र मुद्रास्फीति अघिल्लो वर्षभन्दा बढ्न गएको राष्ट्र बैंकले जनाएको छ । तथापि, २०७४÷७५ को नौ महिनाको औसत उपभोक्ता मुद्रास्फीति भने ४.१ प्रतिशत रहेको छ । तरकारी, फलफुल र दुग्धजन्य तथा अन्डाको भाउ बढेका कारण राष्ट्र बैंकले जनाएको छ । यसअवधिमा खाद्यान्नको भाउ ४.७ प्रतिशतले बढेको छ भने खाद्यान्न बाहेकको मूल्य वृद्धि भने ६.३ प्रतिशतबाट घटेर ५.८ प्रतिशतमा सिमित भएको छ ।
क्षेत्रगत आधारमा समीक्षा अवधिमा उपभोक्ता मुद्रास्फीति हिमालमा ७.० प्रतिशत, पहाडमा ६.० प्रतिशत, तराईमा ५.७ प्रतिशत र काठमाडौं उपत्यकामा ४.३ प्रतिशत रहेको छ । अघिल्लो वर्षको सोही अवधिमा मूल्य वृद्धिदर हिमालमा २.८ प्रतिशत, पहाडमा ५.६ प्रतिशत, तराईमा ३.४ प्रतिशत र काठमाडौं उपत्यकामा २.७ प्रतिशत रहेको थियो ।
त्यसैगरी २०७४ चैत महिनामा नेपालको वार्षिक बिन्दुगत उपभोक्ता मुद्रास्फीति ५.३ प्रतिशत र भारतको ४.६ प्रतिशत रहेको छ । फलतः यी दुई मुलुक बीचको उपभोक्ता मुद्रास्फीति अन्तर ०.७ प्रतिशत रहेको छ । अघिल्लो वर्षको सोही अवधिमा नेपालको मुद्रास्फीति ३.५ प्रतिशत र भारतको ३.० प्रतिशत रहेको थियो ।