काठमाडौं । ३३ किलो सुन प्रकरण र सनम हत्यासँग सम्बन्धित छानबिन समितिले आज जिल्ला अदालत मोरङमा मुद्दा दर्ता गर्ने तयारी गरेको छ । उच्च स्रोतका अनुसार यस घटनासँग जोडिएका तत्कालीन अपराध महाशाखा प्रमुख दिवेश लोहनी पनि मंगलबार नै समितिले बोलाएपछि विराटनगर पुगेका छन् ।

माघ ९ गते दुबई हुँदै काठमाडौं ल्याइएको ३३ किलो अवैध सुन गायब भएपछि यो विषय सार्वजनिक भएको थियो ।

उक्त ३३ किलो सुन चुडामणि उप्रेती गोरेको भएको अनुसन्धानबाट पुष्टि भएको छ । तर गोरे फरार छन् । यहि विषयमा गोरेका सहयोगी सनम शाक्यको हत्या भएको छ । उनको हत्यापछि धेरै विषय बाहिर आएको थियो ।
प्रधानमन्त्रीको निर्देशनपछि गृह मन्त्रालयले ईश्वरराज पौडेलको नेतृत्वमा समिति बनाएको थियो ।

छानबिन समिति अहिले मोरङमा पुगेको छ । प्रहरीले अनुसन्धानका लागि पाएको ६० दिनको समय आज सकिने हुँदा आजै मोरङ जिल्ला अदालतमा मुद्दा दायर गरिने भएको छ । यो घटनामा अहिलेसम्म करिब २८ जनासँग समितिले बयान लिइसकेको छ भने प्रहरीका पूर्वडीआईजी, बहालवाल एसपी लगायतका प्रहरी अधिकारी पक्राउ परिसकेका छन् ।