काठमाडौं । नव वर्ष २०७५ तथा कम्पनीको तेस्रो वार्षिकोत्सवको उपलक्ष्यमा हिमालय एयरलाइन्सले आफ्नो व्यवसायिक सामाजिक उत्तरदायित्व अन्तर्गत पुनः एकपटक ‘प्रयास नेपाल’ लाई सहयोग गरेको छ । प्रयास नेपालले नयाँ शैक्षिक सत्र २०७५/७६ का लागि माग गरेअनुसार एयरलाइन्सले त्यहाँ रहेका आश्रित बालबालिकाहरूलाई एकवर्षका लागि कापी तथा भान्सामा प्रयोग हुने सामाग्री प्रदान गरेको हो ।
हिमालय एयरलाइन्सका प्रतिनिधिहरूले वैशाख २ गते आइतबार बालुवाटारस्थित प्रयास नेपालको कार्यालयमा गएर त्यहाँ रहेका बालबालिका तथा अधिकारीहरूसँग भेटघाट तथा अन्तक्र्रिया गरेका थिए ।
एयरलाइन्सका प्रतिनिधिहरूले बालबालिकालाई कापी सहित अन्य सामाग्री तथा चक्लेटहरू प्रदान गर्दा उनीहरू निकै उत्साही थिए ।
कार्यक्रममा एयरलाइन्सको ब्राण्ड तथा सर्भिस इम्प्रुभ्मेन्ट विभागकी प्रमुख उज्ज्वला दलीले भनिन्, “हिमालय एयरलाइन्सले प्रयास नेपालसँग सहकार्य गर्न पाउँदा निकै खुसी र गौरवान्वित महशुस गरेको छ । हाम्रो सानो सहायताले प्रयास नेपालमा आश्रित बालबालिकालाई प्रोत्साहित र सशक्त गर्दै भविष्यमा आत्मविश्वासी, तथा स्वस्थ बनाउन सहयोग पुग्नेमा हामी आशावादी छौं ।”