बीबीसी । अमेरिकामा एक रेडियो प्रस्तुतकर्ताले प्रत्यक्ष प्रशारणमै बच्चालाई जन्म दिएकी छन् । सेन्ट लुइसको ‘द आर्क’ स्टेसनले यस कार्यक्रमका लागि भनेर विशेष बन्दोबस्त मिलाएको बीबीसीले जानकारी दिएको छ ।
सोमबारदेखि नै प्रस्तुतकर्ता क्यासीडे प्रोक्टरलाई पीडा सुरु भएपछि कार्यक्रमलाई अस्पतालभित्रै प्रशारण गर्ने व्यवस्था गरिएको थियो । बच्चाको जन्म दुईसाता पहिले नै भएकामा उनले यसका लागि अचानक तयारी गर्नुपरेको बताएकी हुन् ।
रेडियो स्टेसनले अस्पतालसँगको सहकारितामा दर्शकमाझ प्रोक्टरले जन्म दिँदाको क्षणलाई प्रशारण गरेको थियो ।
दैनिक प्रशारणमा पनि उनले दर्शकहरुलाई आफ्नो व्यक्तिगत जीवनका विभिन्न अनुभवबारे बताउने गरेकाले यो उनका लागि अहिलेसम्मकै उत्कृष्ट क्षण रहेको उनको भनाइ छ ।
त्यसैले सबै श्रोताहरुलाई जीवनको सबैभन्दा महत्वपूर्ण समयको अनुभव सुनाउन पाउँदा आफूलाई अत्यन्तै खुसी लागेको उनले बीबीसीसँगको कुराकानीमा बताएकी हुन् ।
उनको छोराको नाम पनि दर्शकहरुले नै छनोट गरि जेमसन राखिदिएको बताइएको छ । यसबारे सो कार्यक्रमका अर्का प्रस्तुतकर्ता स्पेन्सर ग्रेभले भने, ‘प्रशारणकै क्रममा यसरी जन्म दिँदाको क्षण दर्शकका लागि समेत जादूमय र अविस्मरणीय बन्न पुगेको छ ।’ अब भने केहि दिनका लागि प्रोक्टर बिदाका बस्ने कार्यक्रमका निर्देशकले बताए ।