काठमाडौं  । माघ २४ गते बुधबार हुने राष्ट्रिय सभा सदस्य निर्वाचनको कार्यतालिका अनुसार आज सातवटै प्रदेशमा रहेका निर्वाचन अधिकृतको कार्यालयमा राष्ट्रिय सभा सदस्य (निर्वाचनक मण्डल) मतदाताहरूको नामावली प्रकाशित गरिएको छ । 

आयोगले माघ ७ गते आज बिहान ११ः३० बजे मतदाता नामावली प्रकाशन गर्ने गरी संशोधित निर्वाचन कार्यतालिका प्रकाशित गरेकोमा आजै सातवटै प्रदेशमा प्रदेश सभा सदस्यको शपथग्रहण कार्यक्रमसमेत रहेको थियो । 

प्रदेश नम्बर १ को मोरङको विराटनगर, प्रदेश नम्बर २ को धनुषाको जनकपुरधाम, प्रदेश नम्बर ३ को ललितपुरको पाटन, प्रदेश नम्बर ४ को कास्कीको पोखरा, प्रदेश नम्बर ५ को दाङ, प्रदेश नम्बर ६ को सुर्खेत र प्रदेश नम्बर ७ को डोटीमा रहेका निर्वाचन अधिकृतको कार्यालयमा मतदाता नामावली प्रकाशित गरिएको छ ।  

राष्ट्रिय सभा सदस्य निर्वाचनमा गाउँपालिकाका अध्यक्ष र उपाध्यक्ष, नगरपालिकाका प्रमुख र उपप्रमुख गरी जम्मा १,५०६ र सातवटा प्रदेशबाट निर्वाचित प्रदेशसभा सदस्य जम्मा ५५० गरी कुल २,०५६ जना मतदाताले मताधिकार प्रयोग गर्ने व्यवस्था रहेको छ । स्थानीय तहमा ७१८ महिला र ७८८ पुरुष छन् भने प्रदेश सभामा पुरुष ३६१ र महिला १८९ जना मतदाता रहेछन् । 

त्यसमध्ये सबैभन्दा बढी प्रदेश नम्बर ५ मा मतदाता रहेका छन् ।