एजेन्सी । भारतविरुद्धको तीन खेलको टेष्ट सिरिज घरेलु टोली दक्षिण अफ्रिकाले जितेको छ । बुधबार दोस्रो टेष्टमा भारतलाई १३५ रनले पराजित गर्दै दक्षिण अफ्रिकाले सिरिज एक खेल अगावै २ – ० ले जितेको हो ।
सेन्चुरीयनमा दक्षिण अफ्रीकाले दिएको २८७ रनको लक्ष्यसहित दोस्रो पारी थालेको भारत ५० ओभर २ बलमा अलआउट हुँदै १५१ रनमा समेटियो । दोस्रो पारीमा भारतका रोहित शर्माले ४७ र मोहमद शामीले २८ रन बनाए । त्यस्तै पार्थिव पटेल र चेतेश्वर पुजाराले समान १९ – १९ रन बनाए । दक्षिण अफ्रिकाका लुँगीसानी नेग्दीले ६ विकेट लिदा कागीसो राबडाले ३ विकेट लिए ।
यसअघि टस जितेर पहिले ब्याटिङ्ग गरेको दक्षिण अफ्रिकाले पहिलो पारीमा ३३५ रन बनाएको थियो । यस्तै दोस्रो पारीमा अलआउट हुँदै २५८ रन बनाएर भारतलाई २८७ रनको लक्ष्य दिएको थियो । दोस्रो पारीमा दक्षिण अफ्रिकाका एबी डी भिलियर्सले ८० तथा डीन एल्गरले ६१ रन बनाए ।
भारतले आफ्नो पहिलो पारीमा सबै विकेटको क्षतिमा ३०७ रन बनाएको थियो । कप्तान विराट कोहलीले १५३ रनको उत्कृष्ट प्रदर्शन गरेपछि भारतको सम्मानजनक स्कोर बनाएको थियो । भारतीय ब्याट्सम्यानलाई सस्तैमा समेट्ने क्रममा घरेलु टोली दक्षिण अफ्रिकाका मोर्न मोर्कलले ४ विकेट लिए ।
दुई टोलीबीचको दोस्रो टेष्ट आइतबार सुरु हुने छ । पहिलो टेष्ट क्रिकेटमा भारत दक्षिण अफ्रिकासँग ७२ रनले पराजित भएको थियो । टेष्ट सिरिजपछि दुई टोलीले ६ खेलको एकदिवसीय सिरिज र ३ खेलको टि – ट्वान्टी खेल खेल्ने छन् ।
