काठमाडौं । भौतिक पूर्वाधार तथा यातायात मन्त्री बीरबहादुर बलायरले प्रदेश प्रमुख नियुक्ति र प्रदेशको अस्थायी मुकाम तोक्न सरकारले दलीय सहमति जुटाउन प्रयास गरिरहेको बताएका छन् ।
बाह्रखरीसँगको टेलिफोन कुराकानीमा यातायातमन्त्री बलायरले प्रदेश प्रमुख नियुक्ति र प्रदेशको अस्थायी मुकाम तोक्न सरकारले दलीय सहमति जुटाउन प्रयास गरिरहेको बताएका हुन् ।
‘‘सरकारले प्रदेश प्रमुख नियुक्ति र प्रदेशको अस्थायी मुकाम तोक्नका लागि दलीय सहमतिको अन्तिम प्रयास गर्न स्वरुप आजको मन्त्री परिषद्बाट कुनै निर्णय नगरेको हो,’’ उनले भने ।
प्रदेश प्रमुखहरुको नियुक्ति र प्रदेश राजधानी संघीयताको पहिलो आधारशिला भएको बताउँदै मन्त्री बलायरले यी दुबै कुरा टुंग्याउन दलहरुबीच राजनीतिक एकता आवश्यक रहेको बताए ।
अहिलेको सरकारले एकलौटी ढंगबाट प्रदेश प्रमुखहरु तोकेर आगामी सरकारले त्यसलाई फेरबदल गरे संघीयतामै आशंका उब्जिने भएकाले सरकार दलीय सहमति जुटाउने प्रयासमा रहेको उनको भनाइ थियो ।
यातायात मन्त्री बलायरले अन्य राजीनतिक दलहरु सहमतिमा नआए सरकारले निर्वाचन आयोगको चुनावी तालिका प्रभावित नहुने गरी प्रदेश प्रमुख र प्रदेशको अस्थायी मुकाम तोक्ने स्पष्ट पारे ।
‘‘दलहरु सहमतिमा नआए संविधान अनुरुप अहिलेको सरकारले सम्पन्न गर्नु पर्ने कार्यभार पूरा गर्न आयोगले राष्ट्रिय सभा निर्वाचनका लागि निर्धारण गरेको तालिकालाई असर नपर्ने गरी निर्णय लिन्छौं,’’ उनले भने ।
यसअघि आज बसेको मन्त्री परिषद् बैठकले प्रदेश प्रमुखहरुको नियुक्ति र प्रदेशहरुको अस्थायी मुकाम तोक्ने बताइएको थियो ।
