धनगढी । बिहिबारबाट धनगढीमा आयोजना हुने पशुपति फारवेष्ट कप फुटबलको तयारी अन्तिम चरणमा पुगेको छ । आयोजक फारवेष्ट पशुपति युवा क्लवले प्रतियोगिताको तेस्रो संस्करणको तयारी अन्तिम चरणमा पुगेको जानकारी दिएको छ ।
धनगढी रंगशालामा हुने प्रतियोगिताको मैदानलाई अन्तिम रुप मात्रै दिन वाँकी रहेको आयोजकले जनाएको छ । आगामी पुस ८ गतेसम्म आयोजना हुने प्रतियोगितामा १६ टोलीले सहभागिता जनाउने छन् । प्रतियोगितामा कैलाली, कञ्चनपुर, दाङका विभिन्न टोलि र विभागीय टोलीको सहभागिता रहने आयोजक फारवेष्ट पशुपति युवा क्लवका अध्यक्ष खेम रावतले जानकारी दिए ।
प्रतियोगिताको खेल तालिका आयोजकले मंगलबार सार्वजनिक गरेको छ । प्रतियोगिताको उद्घाटन खेलमा आयोजक फारवेष्ट पशुपति युवा क्लव वी र मदरल्याण्ड युवा क्लवले प्रतिस्पर्धा गर्ने छन् ।
यो पटक प्रतियोगिताको विजेताले पाउने पुरस्कार राशीमा वृद्धि गरिएको छ । विजेताले नगद ३ लाख प्राप्त गर्ने छन् । त्यस्तै उपविजेताले १ लाख ५० हजार पाउने छन् ।
प्रतियोगितामा विभिन्न ५ वटा विधामा उत्कृष्ट हुने खेलाडीले समान १० – १० हजार पाउने छन् । प्रतियोगिताको अघिल्लो संस्करणको विजेताले दुई लाख पाएका थिए ।
’खेल र खेलाडीको विकासको रहर, छाउँदैछ फारवेष्ट पशुपति कपको लहर’ भन्ने नारा सहित हुने प्रतियोगितामा झण्डै २० लाख खर्च हुने अनुमान गरिएको छ । २०६८ सालमा भएको छैठौं राष्ट्रिय खेलकुद प्रतियोगितामा सुदूरपश्चिमलाई स्वर्ण जिताउने खेलाडीहरूले स्थापना गरेको यो क्लबले फुटबलको विकास गर्दै नयाँ खेलाडी उत्पादन गराउनका लागि फारवेष्ट पशुपति कप आयोजना गर्दै आएको छ ।
