काठमाडौं । सेयर बजार (नेप्से) आइतबार ६ अंकले घटेकोमा सोमबार पनि २.७४ अंकले घटेर १५ सय २७.७५ अंकमा अडिएको छ । बजारमा परिसूचक ओरालो लाग्दा कारोबार घटेर ४६ करोड ४५ लाख ५० हजार रुपैयाँ बराबरको सेयर कारोबार भएको छ । 
१५७ कम्पनीको ८ लाख ५६ हजार ११८ कित्ता सेयर ४ हजार १०१ पटक किनबेच हुँदा उक्त रकम बराबरको कारोबार भएको हो । बजारमा उत्पादनमूलक र अन्य समूहबाहेक ८ वटै  समूहको सेयर परिसूचक घाटेको छ । 
सबैभन्दा धेरै विमा समूहको परिसूचक २६.७३ अंकले घटेको छ । त्यस्तै विकास बैंक, होटेल, माइक्र्रो फाइनान्ससको क्रमशः ९.१, ७.१, ५.४७ अंकले घटेको छ ।

चुनावको नतिजा आइरहेका बेला त्यसमै कारण बजार घटेको तर्क कतिपय लगानीकर्ताले गरेका छन् । तर, कोहिनुर सेक्युरिटिजका प्रबन्ध निर्देशक भरत रानाभाटले बजारमा हल्ला भएजस्तो वाम गठवन्धनले चुनाव जितेका कारण सेयर बजार घटेको भन्ने कुरा सत्य नभएको बताए । “त्यस्तो प्रभाव परेकोे हो भने कि अत्यधिक घट्थ्यो, कि अत्यधिक बढ्थ्यो । मेरो विचारमा त्यस्तो होइन,” उनले भने, “यद्यपि चुनावको कारणले सेयर खरिद र बिक्रीकर्ता ग्राहकहरु आ–आफ्नो घरतिर गएकोले उपस्थितिमा कमी आएकोले केही प्रभाव परेको हुनसक्छ ।”