ad

राजनीति

काठमाडौं–५ को मतगणनामा विवाद, मतदान अधिकृतको हस्ताक्षर नमिलेको भन्दै कांग्रेसको विरोध

काठमाडौं–५ को मतगणनामा विवाद, मतदान अधिकृतको हस्ताक्षर नमिलेको भन्दै कांग्रेसको विरोध

काठमाडौं । एमाले महासचिव ईश्वर पोखरेल र कांग्रेसका प्रकाशशरण महत उमेदवार रहेको काठमाडौं क्षेत्र नं ५ मा मतगणनामा बारम्बार विवाद देखिएको छ ।

काठमाडौंका अन्य क्षेत्रमा मतगणना अन्तिम चरणमा पुग्दा क्षेत्र नम्बर ५ मा भने मतदान अधिकृतको दुई थरी हस्ताक्षर भएको भन्दै कांग्रेसले विवाद निकालेको हो । फरक हस्ताक्षर भएका करिब १० वटा त्यस्ता मतपत्र रहेको कांग्रेसको भनाइ छ ।

शुक्रबार बेलुकादेखि विवादका कारण स्थगित सो क्षेत्रको मतगणना अहिले चलिरहेको छ । यद्यपि कांग्रेस उमेदवार महतले एकलौटी रुपमा मतगणना भइरहेको बताए ।

कांग्रेसले फरक हस्ताक्षर भएको मतपत्र बदर नगरेसम्म गणना मान्य नहुने बताइरहेको छ । तर, निर्वाचन अधिकृत चाणकमणि अर्यालले एउटै व्यक्तिले लामो र छोटो हस्ताक्षर गरेको भन्दै विवाद निकाल्न जरुरी नभएको बताए ।

उनका अनुसार गणनास्थलमा कांग्रेसका प्रतिनिधि पनि बसिरहेका छन् । 

यता एमालेले आफ्नो पक्षमा नतिजा नआउने देखिएपछि कांग्रेसले अनावश्यक विवाद निकालेको आरोप लगाएको छ । 

काठमाडौं ५ मा पछिल्लो नतिजाअनुसार एमालेका ईश्वर पोखरेल ५ हजार ५२२ मत ल्याउँदै अग्रता लिइरहेका छन् भने कांग्रेसका महतको ३ हजार १७३ मत आएको छ । तेस्रो स्थानमा रहेका विवेकशील साझाका उमेदवार उज्ज्वल थापाले १ हजार ९ मत ल्याएका छन् ।

तपाईंको मत