काठमाडौं । भारतको विहारमा अत्यधिक वर्षा र बाढीले गर्दा जनजीवन अस्तव्यस्त भएको छ । यसलाई लिएर केही भारतीय सञ्चार माध्यमले नेपालको वीरपुर कोसी ब्यारेजबाट एक लाख असी हजार क्युसेक पानी छोड्नाले कटिहारमा बाढीको सम्भावना बढेको भन्दै समाचार प्रकाशित गरेका छन् ।

विहारमा लगातार दुई दिनदेखि निकै ठूलो वर्षा भैरहेको छ । त्यहाँ नदी नजिकका बस्तीहरूमा आतंकको वातावरण रहेको समाचारमा जनाइएको छ । चट्याङ र बाढीका कारण विहारमा छत्तीस जनाको ज्यान गएको छ ।  

अहिले वर्षाका कारण गंगा, महानन्दा, बूढी कन्काई, मेची, चेगा र कोसी नदी उर्लिएका छन् । समाचारअनुसार भारतको मुजफ्फरपुरमा सात वर्षपछि सोमबार सबैभन्दा धेरै १३० मिमिभन्दा पनि बढी वर्षा भएको छ । विहारको विपद् प्रबन्धन समितिले भारी वर्षाका कारण पटनाका सबै स्कुलहरूमा मंगलबार आठ कक्षासम्मका लागि छुट्टी गर्न आदेश दिएको छ ।

वर्षाले गर्दा पटना आउन लागेका ५ वटा विमानहरूलाई फर्काएर कलकत्ता र लखनऊ विमानस्थलमा अवतरण गराइएको थियो । रेलको गतिसमेत वर्षाका कारण मन्द रहेको र रेल यातायात प्रभावित बनेको समाचारमा उल्लेख छ ।