काठमाडौं । नेकपा केपी ओली समूहका प्रवक्ता प्रदीप ज्ञवालीले प्रचण्ड-माधव समूहले घोषणा गरेको आन्दोलन फिर्ता लिन आग्रह गरेका छन् । बालुवाटारमा ओलीसमूहको केन्द्रीय कमिटी बैठकपछि उनले भने, “जनमतमा जान छाडेर आन्दोलनका नाममा जनतालाई थप पीडा दिनु जनताबाट तर्सिनु हो । उहाँहरुको निर्णयको औचित्य छैन, फिर्ता लिनुस् ।” 

आजै कार्की ब्यांक्‍वेट बबरमहलमा बसेको प्रचण्ड-माधव पक्षको नेकपाको बैठकले आन्दोलनको घोषणा गरेको थियो । उनले शान्तिपू्र्ण आन्दोलन संविधानले दिएको अधिकार भएको भन्दै जनतालाई दु:ख नदिने गरी प्रयोग गर्न पाइने पनि बताए ।

संसद् विघटन स्वाभाविक कदम
त्यस्तै, उनले प्रतिनिधिसभा विघटन स्वाभाविक र संवैधानिक कदम भएको बताए । संसद् विघटन गर्दासम्म प्रधानमन्त्री ओलीमाथि संसदीय दलको विश्वास कायम रहेको उनको भनाइ थियो ।

“वर्तमान संसद्‌मा प्रधानमन्त्री ओलीले नेतृत्व गर्नुभएको नेकपा ६४ प्रतिशत मतसहित उपस्थित छ । त्यो पार्टीले सर्वसम्मत उहाँलाई दलको नेता चयन गरेको हो । जुन दिन उहाँले प्रतिनिधिसभा विघटनको सिफारिस गर्नुभयो, दलको विश्वास कायम छ,” प्रवक्ता ज्ञवालीले भने, “पार्टी विभाजन भएको छ । ३६ प्रतिशतले सरकार बनाउन सक्ने अवस्था थिएन । त्यस्तो अवस्थामा बहुमत प्राप्त दलको नेताको हैसियतले मैले काम गर्न पाइनँ । त्यसकारण ताजा जनादेशमा जान्छु भन्नु स्वाभाविक, संवैधानिक कदम हो । हामीले त्यस रुपमा लिएका छौं ।”